Eins og öllum er kunnugt hefur nýr meirihluti verið myndaður í borginni. Er það að bera í bakkafullan lækinn að ræða það eitthvað frekar. En hinsvegar er full ástæða fyrir okkur Kjalnesinga að skoða nýja málefnasamninginn. Þar er lögð áhersla á að flýta Sundabraut, sem er eitt stærsta hagsmunamál okkar hér á Kjalarnesinu. Spurningin er samt alltaf þessi, er eitthvað meira spunnið í þessa yfirlýsingu heldur en aðrar sem byrst hafa á öldum ljósvakans síðustu 10 ár varðandi sundabraut frá pólitíkusum þessa lands.

Málefnasamningur F og D lista er svohljóðandi:

• Reykjavíkurflugvöllur verður sýndur í óbreyttri mynd á aðalskipulagi á meðan rannsóknir standa yfir vegna nýs flugvallarstæðis á höfuðborgarsvæðinu. Ekki verður tekin ákvörðun um flutning Reykjavíkurflugvallar á kjörtímabilinu.
• Leitað verður leiða til að varðveita 19. aldar götumynd Laugavegarins og miðborgarinnar eins og kostur er.
• Framkvæmdir hefjist sem fyrst við mislæg gatnamót Miklubrautar og Kringlumýrarbrautar.
• Staðarvali og annarri undirbúningsvinnu vegna lagningar Sundabreytar verði lokið sem fyrst svo framkvæmdir geti hafist.
• Áhersla verður lögð á að tryggja öryggi gangandi og hjólandi vegfarenda.
• Almenningssamgöngur verða efldar. Tilraun um frían aðgang fyrir ákveðna hópa verði haldið áfram. Fargjöld í strætisvagna verði felld niður hjá börnum og unglingum að 18 ára aldri sem og öldruðum og öryrkjum. Unnið verði að því að bæta leiðakerfið og þjónustu við farþega.
• Fjölgun hjúkrunarrýma og þjónustuíbúða fyrir aldraða.
• Efling og samþætting heimaþjónustu og heimahjúkrunar.
• Tekjumörk vegna niðurfellingar fasteignaskatta fyrir elli- og örorkulífeyrisþega verða hækkuð verulega.
• Fasteignaskattar á íbúðarhúsnæði verða lækkaðir á árinu.
• Félagslegum leiguíbúðum Reykjavíkurborgar verður fjölgað um 100 árlega 2008-2010 eða um samtals 300 á tímabilinu.
• Framboð lóða fyrir fjölskyldur og atvinnurekstur verður tryggt.
• Þjónusta leikskóla og grunnskóla verður aukin og faglegt og fjárhagslegt sjálfstæði þeirra styrkt.
• Unnið verður að því að auka öryggi í miðborg Reykjavíkur í samvinnu við lögreglu, íbúa og rekstaraðila.
• Átak verður gert við merkingu og varðveislu sögufrægra staða í borginni.
• Lögð er áhersla á verndun óspilltrar náttúru og að dregið verði úr mengun í borginni þannig að tryggja megi íbúum vistvænt og öruggt umhverfi.
• Orkuveita Reykjavíkur og orkulindir þeirra verða áfram í eigu almennings.

Láttu sjá þig og komdu á kynningarfund
föstudaginn 25. janúar kl 20:00 í Þórnýjarbúð -
Áhaldahús hjá SORPU Kjalarnesi.

{mosimage} Eins og starfsmenn og íbúar í Leirvogstungu vita standa nú miklar framkvæmdir yfir á þessu svæði með umtalsverðri umferð vörubíla þvert yfir Vesturlandsveginn. Mislæg gatnamót á þessum stað munu auka mjög umferðaröryggi og greiða mikið fyrir umferð að og frá Leirvogstungu og Tungumelum og einnig á milli þeirra.

Samningurinn felur það í sér að Vegagerðin samþykkir óskir landeigenda um tilteknar breytingar á Vesturlandsvegi og tengingar við hann. Vesturlandsvegi verður breytt á um 650 m kafla, og mislægt hringtorg byggt með að- og fráreinum sem tengjast munu gatnakerfi beggja vegna vegarins ásamt tveimur brúm yfir Hringveg.

Þátttaka Leirvogstungu og Ístaks í þessari framkvæmd leiðir til þess að verkið verður unnið fyrr en ella og kostnaður Vegagerðarinnar verður töluvert minni. Vegna framkvæmda landeigenda og verktaka beggja vegna Vesturlandsvegarins er þeim unnt að byggja mislægu gatnamótin á hagkvæmari hátt en ella. Samningsaðilarnir þrír skipta með sér kostnaði við þessa framkvæmd.

Frétt af leirvogstunga.is þar má sjá myndband af væntanlegu hringtorgi.

Kristján Möller samgönguráðherra fundaði í dag með fulltrúum íbúasamtaka Laugardals og Grafarvogs, og síðan Vegagerðarinnar, um málefni Sundabrautar. Opinn íbúafundar verður um álit Vegagerðarinnar innan þriggja vikna.

Ráðherra segir einkaframkvæmd ekki útilokaða en það geti þó aldrei orðið án útboðs. Umræðan um Sundabrautina er enn á ný komin á flug eftir að Vegagerðin mælti með eyjalausn en ekki jarðgöngum í síðustu viku. Það hefur verið gagnrýnt harðlega, m.a. af borgarfulltrúum í Reykjavík.

Í dag fundaði ráðherra með fulltrúum íbúasamtaka Laugardals og Grafarvogs um málið en þeir voru óánægðir með að samráðshópur á vegum Reykjavíkurborgar hafi ekki fengið að sjá gögn Vegagerðarinnar.

Ráðherra segist sjálfur orðinn óþreyjufullur eftir að framkvæmdir hefjist en hins vegar sé nauðsynlegt að hafa allar upplýsingar á borðinu, og þetta sé liður í því. Kristján segir einkaframkvæmd ekki útilokaða en gefur lítið fyrir þá skoðun Faxaflóahafna að hægt sé að semja um verkið án útboðs.

Frétt af ruv.is

Faxaflóahafnir óskuðu í mars eftir viðræðum við forsætisráðherra og samgönguráðherra um að fyrirtækið annaðist fjármögnun og byggingu Sundabrautar. Í maí skipaði samgönguráðherra starfshóp til að meta þessar hugmyndir. Í honum voru tveir frá Vegagerðinni, einn frá Faxaflóahöfnum og annar frá fjármálaráðuneytinu. Hópurinn skilaði af sér í gær.

Fulltrúar Vegagerðarinnar og fjármálaráðuneytisins telja að samkvæmt núgildandi lögum sé ekki hægt að semja beint við Faxaflóahafnir um verkið án útboðs. Fulltrúi Faxaflóahafna í starfshópnum, Gísli Gíslason forstjóri fyrirtækisins, var ekki sammála þessu og taldi að hægt væri með sérstökum lögum gera samninga við Faxaflóahafnir um að annast verkið.

Björn Ingi Hrafnsson, stjórnarformaður Faxaflóahafna, er ekki sammála niðurstöðu meirihluta nefndarinnar. Hann segir ekki aðalatriðið að Faxaflóahafnir taki verkið að sér heldur að fá samgönguyfirvöld með í að hraða verkinu. Sífelldar tafir séu ekki ásættanlegar.

Frétt af ruv.is

Stjórn Faxaflóahafna sf. ítrekar fyrri ályktanir um mikilvægi Sundabrautar og nauðsyn þess að verkefnið komist sem allra fyrst á framkvæmdastig. Stjórn Faxaflóahafna sf. skorar á samgönguráðherra og Alþingi að setja verkefnið í forgang og tryggja með markvissum aðgerðum greiðan framgang þess þannig að framkvæmdir við Sundabraut hefjist sem allra fyrst. Ályktanir samtaka og sveitarstjórna á Vesturlandi og borgarstjórnar Reykjavíkur eru samhljóma og á þann veg að frekari tafir á lagningu Sundabrautar séu óásættanlegar.

Skýrsla starfshópsins ber með sér það álit fulltrúa ríkisins að ekki geti orðið af því að semja án útboðs við Faxaflóahafnir sf. um aðkomu og umsjón með verkefninu. Fulltrúi Faxaflóahafna sf. í starfshópnum er ekki sammála þeirri niðurstöðu fulltrúa ríkisins m.a. með vísan til samsvarandi verkefna í Noregi. Stjórn Faxaflóahafna sf. lýsir sig enn sem fyrr reiðubúna að koma að þessu verkefni ef það má verða til þess að hraða framkvæmdum og tryggja framgang þess.

Þau sem standa að þessari ályktun og sitja í stjórn Faxaflóahafna sf. eru Björn Ingi Hrafnsson formaður borgarráðs og formaður Faxaflóahafna, Árni Þór Sigurðsson alþingismaður Reykjavík, Hanna Birna Kristjánsdóttir borgarfulltrúi Reykjavík, Sigrún Elsa Smáradóttir borgarfulltrúi Reykjavík, Gísli Marteinn Baldursson borgarfulltrúi Reykjavík, Páll Brynjarsson sveitarstjóri Borgarbyggð, Sveinn Kristinsson bæjarfulltrúi Akranesi, Þórður Þórðarson bæjarfulltrúi Akranesi, Stefán B. Ármannsson sveitarstjórnarmaður Hvalfjarðarsveit.

Aðkoma opinberra aðila

Kynning og undirbúningur málsins

En af hverju Ísland, og af hverju Hvalfjörður?

Af ábyrgð og ímynd

Samgöngur til og frá höfuðborginni

Að undanförnu hafa átt sér stað talsverðar umræður um samgöngumál og umferðaröryggi. Sú umræða hefur oftar en ekki skapast í framhaldi af slysum eða umferðaróhöppum og inn í þá umræðu blandast eðlilega samgöngur til og frá Reykjavík. Það er því hryggilegt að sjá hversu litla áherslu stjórnvöld leggja á frekari samgöngubætur til og frá höfuðborginni okkar. Samtök Sveitarfélaga á Vesturlandi hafa síðastliðin ár lagt mikla áherslu á mikilvægi tvöföldunar á þjóðvegi 1 frá Holtavörðuheiði að Kollafirði. Hafa samtökin bent á mikilvægi þess að hefjast framkvæmda sem fyrst vegna þeirrar miklu aukningar á þungaflutningum á þessum slóðum síðastliðin ár. Hafa önnur samtök, þar á meðal íbúasamtökin á Kjalanesi sem og Hverfisráð Kjalarness, sent frá sér ályktanir sem snúa að þessum málum. 

Slit og slysahætta

Í dag er ekkert flutningaskip sem siglir úti fyrir ströndum Íslands með viðkomu í helstu höfnum hringinn í kringum landið. Það er eðlilegt að vöruflutningar hafi færst í auknum mæli inn á þjóðvegakerfið vegna krafna um ferskleika vöru við afhendingu. Staðreyndin er hins vegar sú að þróunin hefur leitt til þess að allir flutningar fara landleiðina því ekki hefur þótt hagkvæmt að aðeins hluti vöruflutninga sé á hafi úti. Allir flutningar fara því landleiðina með þeirri miklu umferð sem því fylgir og ómældu sliti á vegakerfinu. Þessir flutningabílar eru allt að 50 tonn fullhlaðnir á meðan meðalfólksbíllinn er innan við 2 tonn. Hver maður sér hina auknu slysahættu sem af þessu hefur hlotist. Það er því löngu tímabært að kanna kosti þess að niðurgreiða strandsiglingar með opinberu fé því talsverður sparnaður hlýtur að koma á móti vegna minna slits á vegakerfi landsmanna og vegna minni slysahættu. Þetta er sú alvarlega staðreynd sem blasir við okkar í dag – flutningar á vörum og sjávarfangi fara þvers og kruss um þjóðvegi landsins, flestir með viðkomu í höfuðborginni, og aldrei kemur Sundabraut. 

Hefjumst handa við tvöföldun þjóðveganna til og frá Reykjavík

Ég tel að á meðan samgönguráðherra er að velta fyrir sér legu Sundabrautar og því hvort innheimta eigi veggjald vegna þeirrar framkvæmdar þá gæti hann byrjað að gera vegina til og frá höfuðborginni sómasamlega. Hann gæti byrjað nú þegar að tvöfalda akreinar frá Borgarnesi að Reykjavík, þ.e. að þeim stað sem Sundabraut kemur upp á Kjalarnes. Vesturlandsvegur í þeirri mynd sem hann er í nú gengur ekki og þolir enga bið. Hið sama á við um Suðurlandsveg til Selfoss. Við höfum horft upp á svo mörg alvarleg slys á þessum vegaköflum undanfarin ár og alltaf þyngist umferðin. 

Landsmenn eru orðnir langþreyttir á aðgerðaleysi samgönguyfirvalda og vilja skýr svör og ákvarðanir. 

Því segi ég vaknaðu herra samgönguráðherra. Slysin gera ekki boð á undan sér. 

Þórir Ingþórsson

Esjugrund 52

116 Kjalarnesi

Marta Guðjónsdóttir fulltrúi sjálfstæðismanna í Hverfaráði Kjalarness skrifaði grein sem birtist í Morgunblaðinu þriðjudaginn 28. mars 2006.

{mosimage}

Kjalarnesið - Vítaverð vanræksla R-listans

Ég hef setið í hverfisráði Kjalarness á þessu kjörtímabili og fylgst þar með þeim vinnubrögðum R-listans er lúta að málefnum íbúanna. Þau vinnubrögð geta ekki fengið aðra umsögn en vítaverð vanræksla. Tekið hefur verið á brýnustu hagsmuna- og öryggismálum íbúanna með fullkomnu sinnuleysi og framtaksleysi og endalausum innantómum loforðum sem flest, ef ekki öll, hafa lent upp í erminni.

Kjalnesingar hlunnfarnir

Sú var tíðin, 1998, að fyrrverandi borgarstjóri, Ingibjörg Sólrún Gísladóttir, hafði uppi fjálglega frasa um gagnkvæma hagsmuni, beggja sveitarfélaganna, Reykjavíkur og Kjalarness, af sameiningunni.

En nú er öldin önnur: R-listanum hefur ekki þótt neitt sjálfsagðara en að svíkja flest loforð gagnvart Kjalnesingum og brjóta á þeim samninga, m.a. þann samning sem sveitarfélögin gerðu með sér við sameininguna. Kjalnesingar hafa svo sannarlega fengið að reyna að þeir eru olnbogabarn borgarinnar. Nú er svo komið að margir málsmetandi Kjalnesingar, telja sig og sveitunga sína hafa heldur betur verið hlunnfarna, og eru farnir að efast um réttmæti sameiningarinnar.

Öryggismál í ólestri

Kjalarnesið er beinlínis lífshættulegt íbúasvæði, börnum, unglingum og fullorðnum. Það er oft stórhættulegt ökumönnum og farþegum þeirra að hægja mikið á sér á Vesturlandsveginum og beygja síðan inn í Grundarhverfið vegna ógnarhraða og sívaxandi umferðar, sífellt stærri og fleiri vöruflutningabíla, að ekki sé nú talað um aðra og fáfarnari afleggjara Vesturlandsvegar á Kjalarnesi.

Sjálfstæðismenn í umhverfisráði lögðu fram tillögur um úrbætur í umferðaröryggismálum á Kjalarnesi 22. febrúar sl., en R-listinn frestaði tillögunni. Það er dæmigerð afstaða þeirra þegar málefni Kjalarness eru annars vegar.

Börn og unglingar á Kjalarnesi hafa reynt eftir megni að leika knattspyrnu í moldarsvaði meðfram Vesturlandsveginum þar sem umferðarþunginn er gífurlegur. Þar er ekki einu sinni rolluheld girðing og svo stutt í þjóðveginn að boltinn fer oft út á og yfir veginn. Börnin og unglingarnir hafa þolinmóð beðið eftir, einum einasta, þokkalegum sparkvelli frá því slíkum velli var lofað fyrir tveimur árum. En þar er líklega til of mikils mælst, enda bólar ekkert á vellinum.

Margsvikin loforð

Meira en helmingur vegakerfisins á Kjalarnesinu er malarvegir eins og tíðkuðust í Reykjavík áður en Geir Hallgrímsson, þáverandi borgarstjóri, útrýmdi slíkum götum og vegum á sjöunda áratug síðustu aldar. Nýbyggingin við grunnskóla hverfisins, Klébergsskóla, heldur ekki vatni og hefur ekki gert það frá því hún var tekin í notkun.

Fjögur ár, samfleytt, frestaðist skólahald við Klébergsskóla vegna seinkunar á framkvæmdum við skólann. Skólalóð Klébergsskóla er algjörlega ófrágengin, þrátt fyrir margítrekuð loforð um frágang hennar. Leikskólinn sem upphaflega og réttilega átti að verða þriggja deilda, var minnkaður niður í tveggja deilda skóla með þeim afleiðingum að hann er nú þegar orðinn of lítill. Aðkoman að honum er kennslubókardæmi í slysagildrum fyrir börn og fullorðna.

Enn hefur ekki verið lokið við gangstéttagerð og ýmsan annan frágang við götur Grundarhverfis þó nú hafi í mörg ár tíðkast í Reykjavík og öðrum bæjarfélögum að ganga frá slíkum framkvæmdaatriðum áður en íbúar flytja í hið nýja hverfi. Og svona gæti ég lengi haldið áfram. Allt er á sömu bókina lært.

Korter fyrir kosningar

Ekkert af þessu er þó aðalatriðið hér: Aðalatriðið er sjálfumgleði og hroki þeirra fulltrúa R-listans sem fimmtudaginn 23. mars sl. létu loks draga sig upp á Kjalarnes á kosningafund, korter fyrir kosningar, hlusta þar á umkvartanir íbúanna, - en tóku síðan til máls og töluðu fjálglega um sínar fallegu framtíðarhugsjónir, en létu umkvartanirnar íbúanna sem vind um eyru þjóta.

Slík framkoma sýnir fádæma valdhroka og er því frágangssök.

Það er athyglisvert, að mörg - jafnvel flest - þeirra úrlausnarefna sem hér koma til álita, kosta borgina óverulegar fjárhæðir miðað við öryggishagsmuni Kjalnesinga. Spurningin snýst því ekki um fjármuni, heldur áhuga á velferð borgaranna og að staðið sé við gerða samninga.

Við sjálfstæðismenn teljum það sjálfsagða skyldu okkar að standa við samninga og gefin loforð. Við viljum láta verkin tala, teljum það skyldu okkar að hlusta á íbúa borgarinnar, forgangsraða verkefnum og framkvæma án tafar það sem er aðkallandi.og varðar öryggi borgarbúa. Við munum því standa við þau fyrirheit á Kjalarnesinu sem R-listinn hefur svikið.

Greinin birtist í Morgunblaðinu þriðjudaginn 28. mars 2006.