1. Kosning í íbúaráð Kjalarness. Til framlagningar.
2. Kosning varaformanns. Til afgreiðslu.
3. Samþykkt fyrir íbúaráð. Til framlagningar.
4. Tillögur stýrihóps um endurskipulagningu og framtíðarsýn fyrir hverfisráð. Til framlagningar.
5. Tilnefningar í bakhóp íbúaráðs Kjalarness. Til afgreiðslu.
6. Úthlutunarreglur hverfissjóðs Reykjavíkurborgar - Ósk um umsögn. Til afgreiðslu.
7. Bréf frá Íbúasamtökum Kjalarness er varðar vatnsdælingu frá Esjugrund 52. Til framlagningar.
8. Bréf frá Íbúasamtökum Kjalarness er varðar svokallaðan Orkuveituveg. Til framlagningar.

Mat á umhverfisáhrifum - ákvörðun um matsskyldu

Skipulagsstofnun hefur tekið ákvörðun um að breikkun Vesturlandsvegar um Kjalarnes, Reykjavík skuli háð mati á umhverfisáhrifum samkvæmt lögum nr. 106/2000.

Ákvörðun Skipulagsstofnunar er aðgengileg hér.

Ákvörðunina má kæra til úrskurðarnefndar umhverfis- og auðlindamála og er kærufrestur til 15. júlí 2019.

Af vef skipulagsstofnunar.

Fréttatilkynning

4.6.2019

Björgun og Reykjavíkurborg undirrituðu samkomulag í gær um að Björgun fái lóð undir starfsemi sína í Álfsnesvík.

Reykjavíkurborg hefur veitt Björgun vilyrði um lóð undir starfsemi sína við Álfsnesvík. Björgun sem vinnur að dýpkun og uppdælingu steinefna úr sjó er hætt starfsemi sinni við Sævarhöfða.

Samkvæmt samningi við Faxaflóahafnir vinnur Björgun að því að ljúka við landfyllingu sem nýtt verður fyrir stækkun Bryggjuhverfisins í Reykjavík og dýpkun innsiglingarrennu í smábátahöfn hverfisins. Björgun hefur hins vegar ekki starfsleyfi lengur á Sævarhöfða til uppdælingar og vinnslu á efni. Fyrirtækið er hins vegar með einhverjar birgðir af steinefnum á athafnasvæðinu sem verða kláraðar á næstunni.

Lóðavilyrðið sem Reykjavíkurborg hefur veitt Björgun er upp á 7,5 hektara lóð við Álfsnesvík á Álfsnesi í Reykjavík og heimilar byggingu 1.200 fermetra húsnæðis. Það er háð þeim skilyrðum að landnotkun á svæðinu verði skilgreind fyrir iðnaðarstarfsemi með breytingu á svæðisskipulagi höfuðborgarsvæðisins og Aðalskipulagi Reykjavíkur sem auglýst verður á næstunni.

Þegar nauðsynlegar breytingar á skipulagi svæðisins hafa verið samþykktar mun borgarráð úthluta Björgun lóð við Álfsnesvík til 40 ára á fyrirhuguðu iðnaðarsvæði.  Björgun mun sjá um að móta lóðina í tiltekna hæð og sjá um nauðsynlegar framkvæmdir við mótun hennar.

Lóðarleiga lóðarinnar ákvarðast samkvæmt gjaldskrá Reykjavíkurborgar. Gatnagerðargjald greiðist ekki þar sem lóðin er utan skilgreinds þéttbýlis samkvæmt aðalskipulagi. Björgun greiðir byggingarréttargjald að fjárhæð 14.500 kr. fyrir hvern fermetra ofanjarðar sem heimilaður verður samkvæmt samþykktu deiliskipulagi á lóðinni. Fjárhæðin skal framreiknast í samræmi við þróun byggingarvísitölu miðað við grunn í maí 2019.

Björgun mun bera kostnað við landmótun svæðisins, bæði í sjó og á landi, fyllingagerð, grjótvarnir, mön við lóðarmörk, gerð viðlegu­mann­virkja og dýpkun á siglingarleið.

Sjá samning í fundargerð borgarráðs

https://reykjavik.is/fundargerdir/fundur-nr-5546

Myndatextar. Björgun vinnur að því að ganga frá athafnasvæði sínu við Sævarhöfða og ganga frá landfyllingu sem nýtt verður fyrir stækkun Bryggjuhverfisins.

Frá undirritun í gær. Lárus Dagur Pálsson framkvæmdastjóri Björgunar og Gísli Gíslason hafnarstjóri Faxaflóahafna sitja. Dagur B. Eggertsson borgarstjóri og Kristín Soffía Jónsdóttir borgarfulltrúi og stjórnarformaður Faxaflóahafna standa fyrir aftan. Skrifað var undir samkomulag á milli Faxaflóahafna og Björgunar um frágang svæðisins og dýpkun að smábátahöfn Bryggjuhverfisins auk undirritunar lóðavilyrðisins.

Vilt þú hafa áhrif á hverfið þitt? - Íbúar stilla upp kjörseðli
Grafarvogur og Kjalarnes - 5. júní 2019 frá kl. 16-18, Hlaðan, frístundamiðstöðin Gufunesbær við Gufunesveg, 112 Reykjavík.

Undanfarin ár hafa hverfisráð tekið ákvarðanir um hvaða 25 hugmyndir af innsendum tækum* hugmyndum fara í kosningu. Í ár ber svo við að ný hverfisráð taka ekki til starfa fyrr en í haust. Því hefur Reykjavíkurborg ákveðið að opna samráðsferlið og gefa íbúum og hagaðilum í hverfunum kost á að velja þær hugmyndir sem verða á kjörseðlinum.

Á eftirfarandi dögum verða opin hús fyrir hverfi Reykjavíkurborgar frá kl. 16-18. Þar munu tækar* hugmyndir hanga uppi á vegg til sýnis. Þátttakendur fá atkvæðaseðil þar sem þeir gefa þeim 25 hugmyndum sem þeim hugnast best atkvæði sitt. Atkvæðaseðlum verður skilað í kjörkassa á staðnum og þær 25 hugmyndir sem fá flest atkvæði verða á kjörseðli hverfisins í hverfakosningunum í haust.

Allir sem hafa sent inn hugmyndir, skrifað rök eða líkað við hugmyndir annarra eru hvattir til þess að koma og hafa áhrif á hvaða 25 hugmyndir fara á kjörseðilinn í haust.

Opið hús fyrir hverfi Reykjavíkurborgar:

Breiðholt - 3. júní 2019 frá kl. 16-18, menningarmiðstöðin Gerðuberg 3-5, 111 Reykjavík.

Miðborg, Vesturbær og Hlíðar - 4. júní 2019 frá kl. 16-18, félagsmiðstöðin Bólstaðarhlíð 43, 105 Reykjavík.

Grafarvogur og Kjalarnes** - 5. júní 2019 frá kl. 16-18, Hlaðan, frístundamiðstöðin Gufunesbær við Gufunesveg, 112 Reykjavík.

Árbær, Grafarholt og Úlfarsárdalur - 11. júní 2019 frá kl. 16-18,
félagsmiðstöðin Holtið, Norðlingabraut 12, 110 Reykjavík

Laugardalur, Háaleiti og Bústaðir - 13. júní 2019 frá kl. 16-18, félagsmiðstöðin Hæðargarður 31, 108 Reykjavík

*Tækar hugmyndir eru þær hugmyndir sem standast lög og reglur, eru innan fjárheimilda verkefnisins, eru útfærðar á landi Reykjavíkurborgar og stangast ekki á við skipulag.

**Alls voru 13 hugmyndir tækar af 25 sem bárust á Kjalarnes og því ekki þörf á uppstillingu á kjörseðil. En tækar hugmyndir verða til sýnis.

Kaffi og kleinur í boði og öll velkomin!

Aðkoma opinberra aðila

Kynning og undirbúningur málsins

En af hverju Ísland, og af hverju Hvalfjörður?

Af ábyrgð og ímynd

Samgöngur til og frá höfuðborginni

Að undanförnu hafa átt sér stað talsverðar umræður um samgöngumál og umferðaröryggi. Sú umræða hefur oftar en ekki skapast í framhaldi af slysum eða umferðaróhöppum og inn í þá umræðu blandast eðlilega samgöngur til og frá Reykjavík. Það er því hryggilegt að sjá hversu litla áherslu stjórnvöld leggja á frekari samgöngubætur til og frá höfuðborginni okkar. Samtök Sveitarfélaga á Vesturlandi hafa síðastliðin ár lagt mikla áherslu á mikilvægi tvöföldunar á þjóðvegi 1 frá Holtavörðuheiði að Kollafirði. Hafa samtökin bent á mikilvægi þess að hefjast framkvæmda sem fyrst vegna þeirrar miklu aukningar á þungaflutningum á þessum slóðum síðastliðin ár. Hafa önnur samtök, þar á meðal íbúasamtökin á Kjalanesi sem og Hverfisráð Kjalarness, sent frá sér ályktanir sem snúa að þessum málum. 

Slit og slysahætta

Í dag er ekkert flutningaskip sem siglir úti fyrir ströndum Íslands með viðkomu í helstu höfnum hringinn í kringum landið. Það er eðlilegt að vöruflutningar hafi færst í auknum mæli inn á þjóðvegakerfið vegna krafna um ferskleika vöru við afhendingu. Staðreyndin er hins vegar sú að þróunin hefur leitt til þess að allir flutningar fara landleiðina því ekki hefur þótt hagkvæmt að aðeins hluti vöruflutninga sé á hafi úti. Allir flutningar fara því landleiðina með þeirri miklu umferð sem því fylgir og ómældu sliti á vegakerfinu. Þessir flutningabílar eru allt að 50 tonn fullhlaðnir á meðan meðalfólksbíllinn er innan við 2 tonn. Hver maður sér hina auknu slysahættu sem af þessu hefur hlotist. Það er því löngu tímabært að kanna kosti þess að niðurgreiða strandsiglingar með opinberu fé því talsverður sparnaður hlýtur að koma á móti vegna minna slits á vegakerfi landsmanna og vegna minni slysahættu. Þetta er sú alvarlega staðreynd sem blasir við okkar í dag – flutningar á vörum og sjávarfangi fara þvers og kruss um þjóðvegi landsins, flestir með viðkomu í höfuðborginni, og aldrei kemur Sundabraut. 

Hefjumst handa við tvöföldun þjóðveganna til og frá Reykjavík

Ég tel að á meðan samgönguráðherra er að velta fyrir sér legu Sundabrautar og því hvort innheimta eigi veggjald vegna þeirrar framkvæmdar þá gæti hann byrjað að gera vegina til og frá höfuðborginni sómasamlega. Hann gæti byrjað nú þegar að tvöfalda akreinar frá Borgarnesi að Reykjavík, þ.e. að þeim stað sem Sundabraut kemur upp á Kjalarnes. Vesturlandsvegur í þeirri mynd sem hann er í nú gengur ekki og þolir enga bið. Hið sama á við um Suðurlandsveg til Selfoss. Við höfum horft upp á svo mörg alvarleg slys á þessum vegaköflum undanfarin ár og alltaf þyngist umferðin. 

Landsmenn eru orðnir langþreyttir á aðgerðaleysi samgönguyfirvalda og vilja skýr svör og ákvarðanir. 

Því segi ég vaknaðu herra samgönguráðherra. Slysin gera ekki boð á undan sér. 

Þórir Ingþórsson

Esjugrund 52

116 Kjalarnesi

Marta Guðjónsdóttir fulltrúi sjálfstæðismanna í Hverfaráði Kjalarness skrifaði grein sem birtist í Morgunblaðinu þriðjudaginn 28. mars 2006.

{mosimage}

Kjalarnesið - Vítaverð vanræksla R-listans

Ég hef setið í hverfisráði Kjalarness á þessu kjörtímabili og fylgst þar með þeim vinnubrögðum R-listans er lúta að málefnum íbúanna. Þau vinnubrögð geta ekki fengið aðra umsögn en vítaverð vanræksla. Tekið hefur verið á brýnustu hagsmuna- og öryggismálum íbúanna með fullkomnu sinnuleysi og framtaksleysi og endalausum innantómum loforðum sem flest, ef ekki öll, hafa lent upp í erminni.

Kjalnesingar hlunnfarnir

Sú var tíðin, 1998, að fyrrverandi borgarstjóri, Ingibjörg Sólrún Gísladóttir, hafði uppi fjálglega frasa um gagnkvæma hagsmuni, beggja sveitarfélaganna, Reykjavíkur og Kjalarness, af sameiningunni.

En nú er öldin önnur: R-listanum hefur ekki þótt neitt sjálfsagðara en að svíkja flest loforð gagnvart Kjalnesingum og brjóta á þeim samninga, m.a. þann samning sem sveitarfélögin gerðu með sér við sameininguna. Kjalnesingar hafa svo sannarlega fengið að reyna að þeir eru olnbogabarn borgarinnar. Nú er svo komið að margir málsmetandi Kjalnesingar, telja sig og sveitunga sína hafa heldur betur verið hlunnfarna, og eru farnir að efast um réttmæti sameiningarinnar.

Öryggismál í ólestri

Kjalarnesið er beinlínis lífshættulegt íbúasvæði, börnum, unglingum og fullorðnum. Það er oft stórhættulegt ökumönnum og farþegum þeirra að hægja mikið á sér á Vesturlandsveginum og beygja síðan inn í Grundarhverfið vegna ógnarhraða og sívaxandi umferðar, sífellt stærri og fleiri vöruflutningabíla, að ekki sé nú talað um aðra og fáfarnari afleggjara Vesturlandsvegar á Kjalarnesi.

Sjálfstæðismenn í umhverfisráði lögðu fram tillögur um úrbætur í umferðaröryggismálum á Kjalarnesi 22. febrúar sl., en R-listinn frestaði tillögunni. Það er dæmigerð afstaða þeirra þegar málefni Kjalarness eru annars vegar.

Börn og unglingar á Kjalarnesi hafa reynt eftir megni að leika knattspyrnu í moldarsvaði meðfram Vesturlandsveginum þar sem umferðarþunginn er gífurlegur. Þar er ekki einu sinni rolluheld girðing og svo stutt í þjóðveginn að boltinn fer oft út á og yfir veginn. Börnin og unglingarnir hafa þolinmóð beðið eftir, einum einasta, þokkalegum sparkvelli frá því slíkum velli var lofað fyrir tveimur árum. En þar er líklega til of mikils mælst, enda bólar ekkert á vellinum.

Margsvikin loforð

Meira en helmingur vegakerfisins á Kjalarnesinu er malarvegir eins og tíðkuðust í Reykjavík áður en Geir Hallgrímsson, þáverandi borgarstjóri, útrýmdi slíkum götum og vegum á sjöunda áratug síðustu aldar. Nýbyggingin við grunnskóla hverfisins, Klébergsskóla, heldur ekki vatni og hefur ekki gert það frá því hún var tekin í notkun.

Fjögur ár, samfleytt, frestaðist skólahald við Klébergsskóla vegna seinkunar á framkvæmdum við skólann. Skólalóð Klébergsskóla er algjörlega ófrágengin, þrátt fyrir margítrekuð loforð um frágang hennar. Leikskólinn sem upphaflega og réttilega átti að verða þriggja deilda, var minnkaður niður í tveggja deilda skóla með þeim afleiðingum að hann er nú þegar orðinn of lítill. Aðkoman að honum er kennslubókardæmi í slysagildrum fyrir börn og fullorðna.

Enn hefur ekki verið lokið við gangstéttagerð og ýmsan annan frágang við götur Grundarhverfis þó nú hafi í mörg ár tíðkast í Reykjavík og öðrum bæjarfélögum að ganga frá slíkum framkvæmdaatriðum áður en íbúar flytja í hið nýja hverfi. Og svona gæti ég lengi haldið áfram. Allt er á sömu bókina lært.

Korter fyrir kosningar

Ekkert af þessu er þó aðalatriðið hér: Aðalatriðið er sjálfumgleði og hroki þeirra fulltrúa R-listans sem fimmtudaginn 23. mars sl. létu loks draga sig upp á Kjalarnes á kosningafund, korter fyrir kosningar, hlusta þar á umkvartanir íbúanna, - en tóku síðan til máls og töluðu fjálglega um sínar fallegu framtíðarhugsjónir, en létu umkvartanirnar íbúanna sem vind um eyru þjóta.

Slík framkoma sýnir fádæma valdhroka og er því frágangssök.

Það er athyglisvert, að mörg - jafnvel flest - þeirra úrlausnarefna sem hér koma til álita, kosta borgina óverulegar fjárhæðir miðað við öryggishagsmuni Kjalnesinga. Spurningin snýst því ekki um fjármuni, heldur áhuga á velferð borgaranna og að staðið sé við gerða samninga.

Við sjálfstæðismenn teljum það sjálfsagða skyldu okkar að standa við samninga og gefin loforð. Við viljum láta verkin tala, teljum það skyldu okkar að hlusta á íbúa borgarinnar, forgangsraða verkefnum og framkvæma án tafar það sem er aðkallandi.og varðar öryggi borgarbúa. Við munum því standa við þau fyrirheit á Kjalarnesinu sem R-listinn hefur svikið.

Greinin birtist í Morgunblaðinu þriðjudaginn 28. mars 2006.