Vonumst til að sjá sem·flesta,

kærar kveðjur, 
hverfisráð Kjalarness

UMFK leitar að sumar starfsmanni
UMFK sér um sumarfrístund á Kjalarnesi fyrir börn á aldrinum 6-12 ára. Í sumarfrístund UMFK er boðið upp á fjölbreytt íþrótta- og tómstundastarf. Við leitum að hressum einstakling eldri en 20 ára til þess að starfa með okkur í sumar.

Helstu verkefni og ábyrgð

• Skipulag á frístundastarfi  fyrir börn 6 -12 ára
• Leiðbeina börnum í leik og starfi
• Samstarf og samskipti við börn, foreldra og annað starfsfólk UMFK

Hæfniskröfur

• Æskilegt er að viðkomandi hafi einhverja reynslu af starfi með börnum og/eða aðra reynslu sem gæti nýst í starfi  
• Áhugi á að vinna með börnum 
• Frumkvæði og sjálfstæði
• Færni í mannlegum samskiptum

Starfsumsókn skal senda á netfangið gudrun.formadur@gmail.com,
ráðið verður sem fyrst.
Allar nánari upplýsingar í síma 849-1427 - Guðrún

Minnum á aðalsafnaðarfund Brautarholtssóknar í Fólkvangi fimmtudaginn 30. maí kl 18:00.

Dagskrá fundarins:
1. ··········· Starfsskýrsla
2. ··········· Reikningar
3. ··········· Kosningar
4. ··········· Önnur mál

Á vegum sóknarnefndar fer fram fjölbreytt og gefandi starf. Sem dæmi er að alla fimmtudaga kemur hópurinn 60+ saman og þiggur kaffi í Fólkvangi um leið og öll heimsins mál eru rædd. Þá er starf Prjónaklúbbsins Esju undir verndarvæng sóknarinnar.

Framundan eru spennandi verkefni í frekari uppbyggingu safnaðarstarfsins eins og í barnastarfi, uppbyggingu kirkjukórs, byggingu aðstöðuhúss við Brautarholtskirkju og minnisvarði um fyrstu kirkju á Íslandi.

Allir eru hjartanlega velkomnir og hvetjum við fólk til að kynna sér og taka þátt í starfinu með því að koma á aðalfundinn í Fólkvangi fimmtudaginn 30. maí.

Aðalfundur ÍK var haldinn í Fólkvangi fimmtudaginn 23. maí sl. Farið var yfir verkefni síðasta árs sem voru fjölmörg eins og Kjalarnesdagar, útgáfa Klébergsbæklingsins,  rekstur Fólkvangs, útgáfumál og rekstur heimasíðunnar. Fjörugar umræður urðu undir þessum lið. Þá var farið yfir reikninga samtakanna. Niðurstöðutölur sýna að verulega þarf að bæta í til að ná endum saman.
Þrátt fyrir að heildar tekjur liðlega þrefölduðust á milli ára hækkuðu gjöldin nánast í samræmi við það og því vantar kr. 211þús upp á að endar nái saman. Ræður þar mestu rekstur Fólkvangs þar sem nauðsynlegt er að efla útleigu til að ná endum saman. Á þessu fyrsta rekstrarári Fólkvangs stendur reksturinn ekki undir nema hlutaaf rafmagns og hita kostnaði. Stærsti hluti í liðnum ógreiddir reikningar er vegna þessara liða. Að því loknu voru reikningar íbúasamtakanna bornir upp og samþykktir samhljóða.

Undir liðnum kosningar var kosið um tvo stjórnarmenn og hlutu kosningu þau Lára Kristín Jóhannsdóttir og Eiríkur Sigurðsson. Ánægjulegt er að með þessu breikkar aldursbilið í stjórninni verulega.

Að loknum þessum liðum var rætt um skoðanakönnuna sem send var út á dögunum, hreinsunardaga, Kjalarnesdaga og starfið framundan. Síðan var fundi slitið um kl. 22.

Ný stjórn ÍK
Að loknum·aðalfundi kom ný stjórn íbúasamtaka Kjalarness (ÍK) kom saman til að skipta með·sér verkum.

Fráfarandi stjórn er þakkað fyrir öll góð verk og þess vænst að við njótum áfram stuðnings þeirra í öllum störfum okkar. Jafnframt þakkar ný stjórn fyrir stuðninginn.

Tilgangur ÍK er að vinna að framfara- og hagsmunamálum íbúanna ásamt því að stuðla að samstarfi og samhug okkar. Fjölmörg aðkallandi mál eru framundan og mörg þeirra þannig að stuðningur og náinni samvinna við önnur félög á Kjalarnesi er mikilvæg til að auðvelda framgang þeirra. Flæði upplýsinga milli íbúanna og til fulltrúa í stjórnum félaga er afar mikilvægt og vill stjórn ÍK hvetja íbúa til að nýta sér fésbókarsíðurnar kjalarnes.is og Fólkvangur ásamt heimasíðunni www.kjalarnes.is.

Ásgeir Harðarson
formaður ÍK

Hér er sýnishorn af Skoðanakönnun sem Íbúasamtök Kjalarness sendu út þriðjudaginn 21. maí. Vakin er athygli á að þetta skjal er einungis
sýnishorn sem telur ekki inn í þessa skoðanakönnun. Ef þú hefur ekki fengið hana ertu enn ekki á póstlista ÍK en þér er velkomið að senda okkur netfangið þitt á ik@kjalarnes.is og þá munum við skrá netfangið þitt í gagnagrunninn þannig að í framtíðinni fáir þú póstinn frá ÍK.  

Aðkoma opinberra aðila

Kynning og undirbúningur málsins

En af hverju Ísland, og af hverju Hvalfjörður?

Af ábyrgð og ímynd

Samgöngur til og frá höfuðborginni

Að undanförnu hafa átt sér stað talsverðar umræður um samgöngumál og umferðaröryggi. Sú umræða hefur oftar en ekki skapast í framhaldi af slysum eða umferðaróhöppum og inn í þá umræðu blandast eðlilega samgöngur til og frá Reykjavík. Það er því hryggilegt að sjá hversu litla áherslu stjórnvöld leggja á frekari samgöngubætur til og frá höfuðborginni okkar. Samtök Sveitarfélaga á Vesturlandi hafa síðastliðin ár lagt mikla áherslu á mikilvægi tvöföldunar á þjóðvegi 1 frá Holtavörðuheiði að Kollafirði. Hafa samtökin bent á mikilvægi þess að hefjast framkvæmda sem fyrst vegna þeirrar miklu aukningar á þungaflutningum á þessum slóðum síðastliðin ár. Hafa önnur samtök, þar á meðal íbúasamtökin á Kjalanesi sem og Hverfisráð Kjalarness, sent frá sér ályktanir sem snúa að þessum málum. 

Slit og slysahætta

Í dag er ekkert flutningaskip sem siglir úti fyrir ströndum Íslands með viðkomu í helstu höfnum hringinn í kringum landið. Það er eðlilegt að vöruflutningar hafi færst í auknum mæli inn á þjóðvegakerfið vegna krafna um ferskleika vöru við afhendingu. Staðreyndin er hins vegar sú að þróunin hefur leitt til þess að allir flutningar fara landleiðina því ekki hefur þótt hagkvæmt að aðeins hluti vöruflutninga sé á hafi úti. Allir flutningar fara því landleiðina með þeirri miklu umferð sem því fylgir og ómældu sliti á vegakerfinu. Þessir flutningabílar eru allt að 50 tonn fullhlaðnir á meðan meðalfólksbíllinn er innan við 2 tonn. Hver maður sér hina auknu slysahættu sem af þessu hefur hlotist. Það er því löngu tímabært að kanna kosti þess að niðurgreiða strandsiglingar með opinberu fé því talsverður sparnaður hlýtur að koma á móti vegna minna slits á vegakerfi landsmanna og vegna minni slysahættu. Þetta er sú alvarlega staðreynd sem blasir við okkar í dag – flutningar á vörum og sjávarfangi fara þvers og kruss um þjóðvegi landsins, flestir með viðkomu í höfuðborginni, og aldrei kemur Sundabraut. 

Hefjumst handa við tvöföldun þjóðveganna til og frá Reykjavík

Ég tel að á meðan samgönguráðherra er að velta fyrir sér legu Sundabrautar og því hvort innheimta eigi veggjald vegna þeirrar framkvæmdar þá gæti hann byrjað að gera vegina til og frá höfuðborginni sómasamlega. Hann gæti byrjað nú þegar að tvöfalda akreinar frá Borgarnesi að Reykjavík, þ.e. að þeim stað sem Sundabraut kemur upp á Kjalarnes. Vesturlandsvegur í þeirri mynd sem hann er í nú gengur ekki og þolir enga bið. Hið sama á við um Suðurlandsveg til Selfoss. Við höfum horft upp á svo mörg alvarleg slys á þessum vegaköflum undanfarin ár og alltaf þyngist umferðin. 

Landsmenn eru orðnir langþreyttir á aðgerðaleysi samgönguyfirvalda og vilja skýr svör og ákvarðanir. 

Því segi ég vaknaðu herra samgönguráðherra. Slysin gera ekki boð á undan sér. 

Þórir Ingþórsson

Esjugrund 52

116 Kjalarnesi

Marta Guðjónsdóttir fulltrúi sjálfstæðismanna í Hverfaráði Kjalarness skrifaði grein sem birtist í Morgunblaðinu þriðjudaginn 28. mars 2006.

{mosimage}

Kjalarnesið - Vítaverð vanræksla R-listans

Ég hef setið í hverfisráði Kjalarness á þessu kjörtímabili og fylgst þar með þeim vinnubrögðum R-listans er lúta að málefnum íbúanna. Þau vinnubrögð geta ekki fengið aðra umsögn en vítaverð vanræksla. Tekið hefur verið á brýnustu hagsmuna- og öryggismálum íbúanna með fullkomnu sinnuleysi og framtaksleysi og endalausum innantómum loforðum sem flest, ef ekki öll, hafa lent upp í erminni.

Kjalnesingar hlunnfarnir

Sú var tíðin, 1998, að fyrrverandi borgarstjóri, Ingibjörg Sólrún Gísladóttir, hafði uppi fjálglega frasa um gagnkvæma hagsmuni, beggja sveitarfélaganna, Reykjavíkur og Kjalarness, af sameiningunni.

En nú er öldin önnur: R-listanum hefur ekki þótt neitt sjálfsagðara en að svíkja flest loforð gagnvart Kjalnesingum og brjóta á þeim samninga, m.a. þann samning sem sveitarfélögin gerðu með sér við sameininguna. Kjalnesingar hafa svo sannarlega fengið að reyna að þeir eru olnbogabarn borgarinnar. Nú er svo komið að margir málsmetandi Kjalnesingar, telja sig og sveitunga sína hafa heldur betur verið hlunnfarna, og eru farnir að efast um réttmæti sameiningarinnar.

Öryggismál í ólestri

Kjalarnesið er beinlínis lífshættulegt íbúasvæði, börnum, unglingum og fullorðnum. Það er oft stórhættulegt ökumönnum og farþegum þeirra að hægja mikið á sér á Vesturlandsveginum og beygja síðan inn í Grundarhverfið vegna ógnarhraða og sívaxandi umferðar, sífellt stærri og fleiri vöruflutningabíla, að ekki sé nú talað um aðra og fáfarnari afleggjara Vesturlandsvegar á Kjalarnesi.

Sjálfstæðismenn í umhverfisráði lögðu fram tillögur um úrbætur í umferðaröryggismálum á Kjalarnesi 22. febrúar sl., en R-listinn frestaði tillögunni. Það er dæmigerð afstaða þeirra þegar málefni Kjalarness eru annars vegar.

Börn og unglingar á Kjalarnesi hafa reynt eftir megni að leika knattspyrnu í moldarsvaði meðfram Vesturlandsveginum þar sem umferðarþunginn er gífurlegur. Þar er ekki einu sinni rolluheld girðing og svo stutt í þjóðveginn að boltinn fer oft út á og yfir veginn. Börnin og unglingarnir hafa þolinmóð beðið eftir, einum einasta, þokkalegum sparkvelli frá því slíkum velli var lofað fyrir tveimur árum. En þar er líklega til of mikils mælst, enda bólar ekkert á vellinum.

Margsvikin loforð

Meira en helmingur vegakerfisins á Kjalarnesinu er malarvegir eins og tíðkuðust í Reykjavík áður en Geir Hallgrímsson, þáverandi borgarstjóri, útrýmdi slíkum götum og vegum á sjöunda áratug síðustu aldar. Nýbyggingin við grunnskóla hverfisins, Klébergsskóla, heldur ekki vatni og hefur ekki gert það frá því hún var tekin í notkun.

Fjögur ár, samfleytt, frestaðist skólahald við Klébergsskóla vegna seinkunar á framkvæmdum við skólann. Skólalóð Klébergsskóla er algjörlega ófrágengin, þrátt fyrir margítrekuð loforð um frágang hennar. Leikskólinn sem upphaflega og réttilega átti að verða þriggja deilda, var minnkaður niður í tveggja deilda skóla með þeim afleiðingum að hann er nú þegar orðinn of lítill. Aðkoman að honum er kennslubókardæmi í slysagildrum fyrir börn og fullorðna.

Enn hefur ekki verið lokið við gangstéttagerð og ýmsan annan frágang við götur Grundarhverfis þó nú hafi í mörg ár tíðkast í Reykjavík og öðrum bæjarfélögum að ganga frá slíkum framkvæmdaatriðum áður en íbúar flytja í hið nýja hverfi. Og svona gæti ég lengi haldið áfram. Allt er á sömu bókina lært.

Korter fyrir kosningar

Ekkert af þessu er þó aðalatriðið hér: Aðalatriðið er sjálfumgleði og hroki þeirra fulltrúa R-listans sem fimmtudaginn 23. mars sl. létu loks draga sig upp á Kjalarnes á kosningafund, korter fyrir kosningar, hlusta þar á umkvartanir íbúanna, - en tóku síðan til máls og töluðu fjálglega um sínar fallegu framtíðarhugsjónir, en létu umkvartanirnar íbúanna sem vind um eyru þjóta.

Slík framkoma sýnir fádæma valdhroka og er því frágangssök.

Það er athyglisvert, að mörg - jafnvel flest - þeirra úrlausnarefna sem hér koma til álita, kosta borgina óverulegar fjárhæðir miðað við öryggishagsmuni Kjalnesinga. Spurningin snýst því ekki um fjármuni, heldur áhuga á velferð borgaranna og að staðið sé við gerða samninga.

Við sjálfstæðismenn teljum það sjálfsagða skyldu okkar að standa við samninga og gefin loforð. Við viljum láta verkin tala, teljum það skyldu okkar að hlusta á íbúa borgarinnar, forgangsraða verkefnum og framkvæma án tafar það sem er aðkallandi.og varðar öryggi borgarbúa. Við munum því standa við þau fyrirheit á Kjalarnesinu sem R-listinn hefur svikið.

Greinin birtist í Morgunblaðinu þriðjudaginn 28. mars 2006.