Aðalfundarboð Sögufélagsins Steina

Aðalfundur Sögufélagsins Steina verður haldinn í Fólkvangi miðvikudaginn 27. febrúar og hefst stundvíslega kl. 20:00.

Dagskrá:

1. Venjuleg aðalfundarstörf
2. Önnur mál
   

Á döfinni er póstlisti þar sem vakin er athygli á atburðum sem eru framundan á Kjalarnesi. Ert þú áskrifandi af þessum lista?
Í viku 7 fór eftirfarandi póstur til áskrifenda. Til að skrá sig á póstlistann·sendið þið póst á ik@kjalarnes.is.

• BREYTTUR OPNUNARTÍMI. Tekið er á móti skilagjaldsskildum umbúðum í Áhaldahúsinu alla miðvikudaga milli kl. 15 og 19.

• Föstudaginn 15. febrúar er síðasti skiladagur hugmynda inn á vefinn Betri hverfi.

• Laust starf á frístundaheimilinu Kátakoti.

• Fræðslufundurinn „Hvernig verndum við börn gegn kynferðisofbeldi?“ verður í Klébergsskóla fimmtudaginn 14. febrúar kl. 18.

• Pappír er ekki rusl, Minnum á upplýsingar um flokkun á heimasíðunni okkar www.kjalarnes.is.

• Barnaguðsþjónusta í Brautarholtskirkju, sunnudaginn 17. febrúar kl. 11:00.

• Kjalnesingur kemur að óbreyttu næst út í viku 11. Þeir sem vilja koma auglýsingum, tilkynningum eða upplýsingum á framfæri eru beðnir að senda þær á netfangið kjalnesingur@kjalarnes.is. 

Fylgist með www.kjalarnes.is, „á döfinni“ og fésbókarsíðunum Kjalarnes.is og Fólkvangur.  

Við leitum til þín um að deila og merkja við „Like“ á atburðina sem birtast á fésbókarsíðum okkar. Þannig hjálpar þú okkur að koma þessum upplýsingum t.d. eins og starfsauglýsingunni á framfæri við sem flesta.

Vinsamlega hvetjið vini og nágranna til að vera á póstlista Íbúasamtakanna. 

Með kveðju,
Stjórn Íbúasamtaka Kjalarness
ik@kjalarnes.is

Hvernig verndum við börn gegn kynferðisofbeldi?

Fimmtudaginn 14. febrúar nk. milli kl. 18 og 19 standa skólarnir á Kjalarnesi fyrir fræðslufundi um brýnt málefni. Kolbrún Baldursdóttir, sálfræðingur, heldur erindi fyrir foreldra og skólafólk sem ber yfirskriftina: Hvernig verndum við börn gegn kynferðisofbeldi.

Erindið er ætlað foreldrum barna og starfsmönnum í leikskólanum Bakkabergi og Klébergsskóla og er haldið í sal Klébergsskóla.
Farið verður í:

• Skilgreiningar og birtingamyndir
• Hverjir  eru í áhættuhópi? 
• Hvar á misnotkun sér helst stað?
• Þegar gerandi er nákominn
• Forvarnir, fræðsla: fyrirbyggjandi aðgerðir
• Samvinna skóla/grasrótasamtaka og heimila
• Viðbrögð fullorðinna þegar barn segir frá

Í SAMFÉLAGINU leynast víða hættur, sumar hverjar fyrirsjáanlegar sem auðvelt er að fræða börnin um hvernig beri að varast en aðrar leyndari og þar af leiðandi hættulegri.·Kynferðisafbrotamenn fyrirfinnast í okkar samfélagi en hversu margir glíma við þann sjúkleika að vilja áreita og misnota börn kynferðislega er ekki vitað. Staðreyndin er að ekki er hægt að fría samfélagið af þessum brotamönnum fremur en öðrum. Ákveðinn hópur
þeirra mun ávallt verða meðal vor í einhverjum mæli. Sjá nánari umfjöllun·hér·.

Með kveðju,
Klébergsskóli og leikskólinn Bakkaberg

Ábending um skiladag.

Verkefnahópurinn um Betri Reykjavík bendir Kjalnesingum á að síðasti dagur til að setja inn hugmyndir að framkvæmdum í hverfinu okkar árið 2013 er 15. febrúar. Einnig er hægt að gera athugasemdir við þær tillögur sem komnar eru inn á vefinn.  Til þess að setja inn tillögu er farið inn á

www.betrireykjavik.is og valið betri hverfi og svo Kjalarnes. Einnig er hægt að gera athugasemdir við þær tillögur sem komnar eru inn á vefinn.

Breyttur opnunartími á Kjalarnesi

Frá og með miðvikud. 6. febrúar verður breyttur opnunartími á móttöku skilagjaldskyldra umbúða í áhaldahúsinu á Kjalarnesi.

Nýi opnunartíminn er á miðvikudögum kl. 15:00 – 19:00.

SORPA

Almenna reglan er að drykkjarvöruumbúðir, fyrir utan þær umbúðir sem innihalda vín, þurfa að hafa innihaldið vatn með eða án kolsýru, eða vatnsblönduð efni til drykkjar, tl að vera skilagjaldsskyldar. Um er að ræða tilbúna drykkjarvöru sem hægt er að drekka beint úr viðkomandi umbúðum.

Nánari upplýsingar má nálgast hér á heimasíðu Sorpu. 

Aðkoma opinberra aðila

Kynning og undirbúningur málsins

En af hverju Ísland, og af hverju Hvalfjörður?

Af ábyrgð og ímynd

Samgöngur til og frá höfuðborginni

Að undanförnu hafa átt sér stað talsverðar umræður um samgöngumál og umferðaröryggi. Sú umræða hefur oftar en ekki skapast í framhaldi af slysum eða umferðaróhöppum og inn í þá umræðu blandast eðlilega samgöngur til og frá Reykjavík. Það er því hryggilegt að sjá hversu litla áherslu stjórnvöld leggja á frekari samgöngubætur til og frá höfuðborginni okkar. Samtök Sveitarfélaga á Vesturlandi hafa síðastliðin ár lagt mikla áherslu á mikilvægi tvöföldunar á þjóðvegi 1 frá Holtavörðuheiði að Kollafirði. Hafa samtökin bent á mikilvægi þess að hefjast framkvæmda sem fyrst vegna þeirrar miklu aukningar á þungaflutningum á þessum slóðum síðastliðin ár. Hafa önnur samtök, þar á meðal íbúasamtökin á Kjalanesi sem og Hverfisráð Kjalarness, sent frá sér ályktanir sem snúa að þessum málum. 

Slit og slysahætta

Í dag er ekkert flutningaskip sem siglir úti fyrir ströndum Íslands með viðkomu í helstu höfnum hringinn í kringum landið. Það er eðlilegt að vöruflutningar hafi færst í auknum mæli inn á þjóðvegakerfið vegna krafna um ferskleika vöru við afhendingu. Staðreyndin er hins vegar sú að þróunin hefur leitt til þess að allir flutningar fara landleiðina því ekki hefur þótt hagkvæmt að aðeins hluti vöruflutninga sé á hafi úti. Allir flutningar fara því landleiðina með þeirri miklu umferð sem því fylgir og ómældu sliti á vegakerfinu. Þessir flutningabílar eru allt að 50 tonn fullhlaðnir á meðan meðalfólksbíllinn er innan við 2 tonn. Hver maður sér hina auknu slysahættu sem af þessu hefur hlotist. Það er því löngu tímabært að kanna kosti þess að niðurgreiða strandsiglingar með opinberu fé því talsverður sparnaður hlýtur að koma á móti vegna minna slits á vegakerfi landsmanna og vegna minni slysahættu. Þetta er sú alvarlega staðreynd sem blasir við okkar í dag – flutningar á vörum og sjávarfangi fara þvers og kruss um þjóðvegi landsins, flestir með viðkomu í höfuðborginni, og aldrei kemur Sundabraut. 

Hefjumst handa við tvöföldun þjóðveganna til og frá Reykjavík

Ég tel að á meðan samgönguráðherra er að velta fyrir sér legu Sundabrautar og því hvort innheimta eigi veggjald vegna þeirrar framkvæmdar þá gæti hann byrjað að gera vegina til og frá höfuðborginni sómasamlega. Hann gæti byrjað nú þegar að tvöfalda akreinar frá Borgarnesi að Reykjavík, þ.e. að þeim stað sem Sundabraut kemur upp á Kjalarnes. Vesturlandsvegur í þeirri mynd sem hann er í nú gengur ekki og þolir enga bið. Hið sama á við um Suðurlandsveg til Selfoss. Við höfum horft upp á svo mörg alvarleg slys á þessum vegaköflum undanfarin ár og alltaf þyngist umferðin. 

Landsmenn eru orðnir langþreyttir á aðgerðaleysi samgönguyfirvalda og vilja skýr svör og ákvarðanir. 

Því segi ég vaknaðu herra samgönguráðherra. Slysin gera ekki boð á undan sér. 

Þórir Ingþórsson

Esjugrund 52

116 Kjalarnesi

Marta Guðjónsdóttir fulltrúi sjálfstæðismanna í Hverfaráði Kjalarness skrifaði grein sem birtist í Morgunblaðinu þriðjudaginn 28. mars 2006.

{mosimage}

Kjalarnesið - Vítaverð vanræksla R-listans

Ég hef setið í hverfisráði Kjalarness á þessu kjörtímabili og fylgst þar með þeim vinnubrögðum R-listans er lúta að málefnum íbúanna. Þau vinnubrögð geta ekki fengið aðra umsögn en vítaverð vanræksla. Tekið hefur verið á brýnustu hagsmuna- og öryggismálum íbúanna með fullkomnu sinnuleysi og framtaksleysi og endalausum innantómum loforðum sem flest, ef ekki öll, hafa lent upp í erminni.

Kjalnesingar hlunnfarnir

Sú var tíðin, 1998, að fyrrverandi borgarstjóri, Ingibjörg Sólrún Gísladóttir, hafði uppi fjálglega frasa um gagnkvæma hagsmuni, beggja sveitarfélaganna, Reykjavíkur og Kjalarness, af sameiningunni.

En nú er öldin önnur: R-listanum hefur ekki þótt neitt sjálfsagðara en að svíkja flest loforð gagnvart Kjalnesingum og brjóta á þeim samninga, m.a. þann samning sem sveitarfélögin gerðu með sér við sameininguna. Kjalnesingar hafa svo sannarlega fengið að reyna að þeir eru olnbogabarn borgarinnar. Nú er svo komið að margir málsmetandi Kjalnesingar, telja sig og sveitunga sína hafa heldur betur verið hlunnfarna, og eru farnir að efast um réttmæti sameiningarinnar.

Öryggismál í ólestri

Kjalarnesið er beinlínis lífshættulegt íbúasvæði, börnum, unglingum og fullorðnum. Það er oft stórhættulegt ökumönnum og farþegum þeirra að hægja mikið á sér á Vesturlandsveginum og beygja síðan inn í Grundarhverfið vegna ógnarhraða og sívaxandi umferðar, sífellt stærri og fleiri vöruflutningabíla, að ekki sé nú talað um aðra og fáfarnari afleggjara Vesturlandsvegar á Kjalarnesi.

Sjálfstæðismenn í umhverfisráði lögðu fram tillögur um úrbætur í umferðaröryggismálum á Kjalarnesi 22. febrúar sl., en R-listinn frestaði tillögunni. Það er dæmigerð afstaða þeirra þegar málefni Kjalarness eru annars vegar.

Börn og unglingar á Kjalarnesi hafa reynt eftir megni að leika knattspyrnu í moldarsvaði meðfram Vesturlandsveginum þar sem umferðarþunginn er gífurlegur. Þar er ekki einu sinni rolluheld girðing og svo stutt í þjóðveginn að boltinn fer oft út á og yfir veginn. Börnin og unglingarnir hafa þolinmóð beðið eftir, einum einasta, þokkalegum sparkvelli frá því slíkum velli var lofað fyrir tveimur árum. En þar er líklega til of mikils mælst, enda bólar ekkert á vellinum.

Margsvikin loforð

Meira en helmingur vegakerfisins á Kjalarnesinu er malarvegir eins og tíðkuðust í Reykjavík áður en Geir Hallgrímsson, þáverandi borgarstjóri, útrýmdi slíkum götum og vegum á sjöunda áratug síðustu aldar. Nýbyggingin við grunnskóla hverfisins, Klébergsskóla, heldur ekki vatni og hefur ekki gert það frá því hún var tekin í notkun.

Fjögur ár, samfleytt, frestaðist skólahald við Klébergsskóla vegna seinkunar á framkvæmdum við skólann. Skólalóð Klébergsskóla er algjörlega ófrágengin, þrátt fyrir margítrekuð loforð um frágang hennar. Leikskólinn sem upphaflega og réttilega átti að verða þriggja deilda, var minnkaður niður í tveggja deilda skóla með þeim afleiðingum að hann er nú þegar orðinn of lítill. Aðkoman að honum er kennslubókardæmi í slysagildrum fyrir börn og fullorðna.

Enn hefur ekki verið lokið við gangstéttagerð og ýmsan annan frágang við götur Grundarhverfis þó nú hafi í mörg ár tíðkast í Reykjavík og öðrum bæjarfélögum að ganga frá slíkum framkvæmdaatriðum áður en íbúar flytja í hið nýja hverfi. Og svona gæti ég lengi haldið áfram. Allt er á sömu bókina lært.

Korter fyrir kosningar

Ekkert af þessu er þó aðalatriðið hér: Aðalatriðið er sjálfumgleði og hroki þeirra fulltrúa R-listans sem fimmtudaginn 23. mars sl. létu loks draga sig upp á Kjalarnes á kosningafund, korter fyrir kosningar, hlusta þar á umkvartanir íbúanna, - en tóku síðan til máls og töluðu fjálglega um sínar fallegu framtíðarhugsjónir, en létu umkvartanirnar íbúanna sem vind um eyru þjóta.

Slík framkoma sýnir fádæma valdhroka og er því frágangssök.

Það er athyglisvert, að mörg - jafnvel flest - þeirra úrlausnarefna sem hér koma til álita, kosta borgina óverulegar fjárhæðir miðað við öryggishagsmuni Kjalnesinga. Spurningin snýst því ekki um fjármuni, heldur áhuga á velferð borgaranna og að staðið sé við gerða samninga.

Við sjálfstæðismenn teljum það sjálfsagða skyldu okkar að standa við samninga og gefin loforð. Við viljum láta verkin tala, teljum það skyldu okkar að hlusta á íbúa borgarinnar, forgangsraða verkefnum og framkvæma án tafar það sem er aðkallandi.og varðar öryggi borgarbúa. Við munum því standa við þau fyrirheit á Kjalarnesinu sem R-listinn hefur svikið.

Greinin birtist í Morgunblaðinu þriðjudaginn 28. mars 2006.