Hin keltneska síðdegissögustund Steina var haldin í Fólkvangi sl. laugardag. Aðsókn var með eindæmum góð en þar mættu 55-60 manns.

Þar héldu íslenskufræðingarnir Svavar Sigmundsson og Gísli Sigurðsson erindi um keltnesk áhrif á Kjalarnesi og víðar hérlendis.

Merkilegt er að mörg sömu örnefni á svæðinu við Faxaflóa er að finna á litlu svæði í Ljóðhúsum (eyjan Lewis í Suðureyjum, rétt norður af eynni Skye, vestur af Skotlandi). Þessi samsvörun gefur þá sennilegustu skýringu af örnefnum á þessu svæði að þau séu að einhverju leyti meðflutt, þ.e. norrænir menn höfðu sest að á Suðureyjum og fluttu þaðan með sér örnefni til Íslands, þ.e. "innfluttur örnefnapakki frá Ljóðhúsum" eins og Gísli orðaði það. Sum þessara örnefna voru væntanlega norræn í upphafi og eiga sér þannig samsvörun á Norðurlöndum, meðan önnur geta verið keltnesk að uppruna. Örnefnin sem um ræðir eru Esja (Esjufjall í Ljóðhúsum), Melar (Melbólstaðr í Ljóðhúsum), Garðar (Garðabólstaðr í Ljóðhúsum),Akranes, Laxá, Kjós, Sandvík, Leiruvogur og Leirvogsá ( Leirá í Ljóðhúsum).

Þó að Svavar dragi í efa meintan keltneskan uppruna sumra örnefna á Kjalarnesi er hann ekki að draga úr keltneskum áhrifum á Íslandi og tekur fram að þau eru sterk á vestari helming landsins,

Gísli tekur við þar sem Svavar lauk máli sínu og fjallar um málefnið, keltnesk áhrif, frá öðru sjónarhorni. Upplegg Gísla er sögulegt og styðst hann þá að nokkru við fornrit. Hann tekur það fram að fornrit eru ekki alveg áreiðanlegar söguheimildir, þar sem þau rit eru skrifuð að pöntun höfðingja sem stóðu uppi sem sigurvegarar í landnáminu, þ.e. norrænna manna.

Gísli tekur dæmi af sögnum sem eru sláandi líkar í rituðum fornum keltneskum heimildum og svo í íslenskum fornsögum, t.d.
Kjalnesingasögu. Hann bar t.d. saman írsku goðsagnahetjuna Cú Chulainn og Búa í Kjalnesingasögu en með þeim má sjá ákveðin líkindi.

Það sem er sérstakt í þessu efni eru þó ekki samsvaranir í söguefni heldur sú staðreynd að Íslendingar og Írar eiga sameiginlega sögu af ritun efnis um margar aldir. Írar eiga ritað efni frá fimmtu eða sjöttu öld, Íslendingar taka upp þráðinn við ritun nokkrum öldum síðar en miklum mun fyrr en þekkist á öðrum Norðurlöndum.

Sameiginleg niðurstaða tveggja ákaflega hæfra fræðamanna, Svavars og Gísla, er um mjög blandaðan uppruna Íslendinga.
Við eigum vissulega tungumál og ættir að rekja til Norðurlanda en verulega stór þáttur í okkur á rætur í keltneskri menningu, í Skotlandi og á Írlandi.

Að lokum kynnti Gwendolin N. Corday danskennari skoska dansa sem geta varið ansi flóknir ef marka má myndir hennar. Gestir fengu síðan að spreyta sig á skoskum hringdansi og stóðu sig með mikilli prýði.

Stjórnin og velvildarmenn hennar

Íþrótta- og tómstundafulltrú
Klébergsskóli

Klébergsskóli, Kjalarnesi og Ungmennafélag Kjalnesinga auglýsa laust starf íþrótta- og tómstundafulltrúa á Kjalarnesi.

Klébergsskóli og Ungmennafélag Kjalnesinga eru í góðu samstarfi og er vilji til að efla samstarfið enn frekar með sameiginlegum starfsmanni til að starfa að íþrótta- og tómstundamálum á svæðinu og jafnframt starfa í félagsmiðstöðinni Flógyn, Klébergsskóla. Um er að ræða 100% starf. Ráðið verður í starfið til eins árs, möguleiki á framlengingu.

Helstu verkefni og ábyrgð

Skipulagning og umsjón með íþróttastarfi UMFK.
Skipulagning félagsmiðstöðvarstarfsins í samráði við umsjónarmann félagsstarfsins, unglinga og starfsfólk félagsmiðstöðvarinnar.
Samskipti og samstarf við skóla, foreldra og annað starfsfólk sem kemur að starfi með unglingum.
Ýmis konar upplýsinga-, forvarnar- og kynningarstarf.

Hæfniskröfur
Háskólamenntun sem tengist starfinu, t.d. íþróttafræði eða íþróttakennari.
Hæfni í mannlegum samskiptum, jákvæðni, frumkvæði og framtakssemi.
Reynsla af starfi með börnum eða unglingum.
Almenn tölvukunnátta auk skipulags- og stjórnunarhæfileika.

Frekari upplýsingar um starfið
Launakjör eru samkvæmt kjarasamningi Reykjavíkur og viðkomandi stéttarfélags
Starfshlutfall 100%
Umsóknarfrestur 10.04.2011

Nánari upplýsingar um starfið veitir Björgvin Þór Þórhallsson í síma 566 6083 eða með því að senda fyrirspurnir á bjorgvin.thor.thorhallsson@reykjavik.is

Klébergsskóli
Kjalarnesi
116 Kjalarnes

Sögufélagið Steini kynnir:

Keltnesk síðdegissögustund verður haldin í Fólkvangi á Kjalarnesi laugardaginn 26.mars kl. 16:00-18:00

Svavar Sigmundsson, fyrrum forstöðumaður Örnefnastofnunar Íslands og fyrrum rannsóknarprófessor og stofustjóri nafnfræðisviðs Árnastofnunar, heldur erindið:
Keltnesk örnefni á Kjalarnesi?

Gísli Sigurðsson, rannsóknarprófessor og stofustjóri þjóðfræðisviðs Árnastofnunar, fjallar um:
Írskar fornsögur um fólk á Kjalarnesi

Gwendolin N. Corday danskennari kynnir Skoskan dans.

Kaffi og kökur –
Aðgangseyrir 1.000 kr fyrir fullorðna.

Stjórn Steina  s. 8918012 / 6592876

Hafinn er undirbúningur þess að senda inn stjórnsýslukæru verði af lokun Sorpu á Kjalarnesi.  Íbúasamtök Kjalarness sendu því eftirfarandi áskorun til borgarstjórnar:

Við sameiningu Kjalarneshrepps og Reykjavíkurborgar var lögð mikil og vönduð vinna í að skapa framtíðarsýn fyrir þessi sameinuðu sveitarfélög. Þessi framtíðarsýn var samþykkt bæði í borgarstjórn og hjá Kjalarneshreppi og var síðan grundvöllur sameiningarinnar sem samþykkt var í almennri atkvæðagreiðslu í báðum sveitarfélögunum.

Þetta heiðursmannasamkomulag var m.a. um að borgin fengi gríðarlegt land til afnota því við sameininguna myndi tvöfaldast það land sem borgin hefði til umráða. Á móti þessu yrði m.a. haldið úti umsaminni þjónustu á Kjalarnesi sem tilgreind var. Nú hefur borgarráð samþykkt að leggja skuli af endurvinnslustöð Sorpu á Kjalarnesi en það er í andstöðu við áðurnefnt samkomulag þar sem tilgreint var að gámastaður skildi starfræktur á Kjalarnesi.

Oft er dregið úr þjónustu þar sem fólki fækkar en það getur vart verið ástæða í tilviki Kjalarness þar sem íbúum hefur fjölgað um tæp 60% frá sameiningu. Á það má einnig benda að á sama tíma hefur atvinnutækifærum á svæðinu snar fækkað og er nú svo komið að þar sem íbúar gátu áður ekki sinnt öllum þeim atvinnutækifærum sem til staðar voru þá búum við í dag við eitt mesta atvinnuleysi af hverfum borgarinnar.

Að leggja niður þessa þjónustu er ekkert annað en brot á þeirri stefnu sem mörkuð var. Hver er nú réttur borgaranna í hinu sameinaða sveitarfélagi?

Kjalnesingar skora á borgarstjórn að fylgja þeirri stefnu sem mörkuð var í áðurnefndu heiðursmannasamkomulagi og sjá til þess að endurvinnslustöðin á Kjalarnesi verði starfrækt áfram.

Virðingarfyllst,
f.h. Íbúasamtaka Kjalarness,
Ásgeir Harðarson

Skólaþing Klébergsskóla var haldið fimmtudaginn 10 mars. Þrátt fyrir blindbyl mætti góður hópur til að setja fram sínar skoðanir á starfi og stefnu skólans.

Eftir vandaðan undirbúning var lagt upp með fjölmarga áhugaverða málaflokka eins og stefnu skólans, ímynd og skipulag ásamt félagsmiðstöðinni. Það komu fram fjölmörg áhersluatriði eins og mikilvægi þessa að innleiða einkunnarorðum skólans meðal starfsmanna, nemenda og foreldra, auka áherslu á mælanleg markmið til að átta sig á hvaða árangri Klébergsskóli er að ná. Það er mikilvægt að nýta fámennið og nálægðina við nemendurna og hugsanlega skapa skólanum sérstöðu í einhverjum verkefnum sem gætu verið styrkhæf úr einhverjum sjóðum.

Rætt var um liti sem einkenni skólans. Hópnum fannst merki skólans gildishlaðið en þó mikill húmor í því. Erfitt að koma merkinu fyrir því það er svo aflangt. Aðkoma að Klébergsskóla ásamt viðhaldi húsa verður aðvera í lagi. Leggja verður áherslu á gildi skólans sérstaklega virðinguna og mikilvægt að vinna skipulaga með þessi gildi innan skólans.

Í frístunda og félagsstarfi er mjög mikil þátttaka en alltaf einhverjir sem ekki mæta. Rætt um hvernig má mætti til þess hóps. Hver eru markmiðin? Vilja foreldrar hafa áhrif á hvaða starf fer þarna fram. Hugmyndabanki er nauðsynlegur og áhugavert að fá einhverja foreldra til að kynna sín áhugamál og sérhæfðu verkefni.

Aðkoma opinberra aðila

Kynning og undirbúningur málsins

En af hverju Ísland, og af hverju Hvalfjörður?

Af ábyrgð og ímynd

Samgöngur til og frá höfuðborginni

Að undanförnu hafa átt sér stað talsverðar umræður um samgöngumál og umferðaröryggi. Sú umræða hefur oftar en ekki skapast í framhaldi af slysum eða umferðaróhöppum og inn í þá umræðu blandast eðlilega samgöngur til og frá Reykjavík. Það er því hryggilegt að sjá hversu litla áherslu stjórnvöld leggja á frekari samgöngubætur til og frá höfuðborginni okkar. Samtök Sveitarfélaga á Vesturlandi hafa síðastliðin ár lagt mikla áherslu á mikilvægi tvöföldunar á þjóðvegi 1 frá Holtavörðuheiði að Kollafirði. Hafa samtökin bent á mikilvægi þess að hefjast framkvæmda sem fyrst vegna þeirrar miklu aukningar á þungaflutningum á þessum slóðum síðastliðin ár. Hafa önnur samtök, þar á meðal íbúasamtökin á Kjalanesi sem og Hverfisráð Kjalarness, sent frá sér ályktanir sem snúa að þessum málum. 

Slit og slysahætta

Í dag er ekkert flutningaskip sem siglir úti fyrir ströndum Íslands með viðkomu í helstu höfnum hringinn í kringum landið. Það er eðlilegt að vöruflutningar hafi færst í auknum mæli inn á þjóðvegakerfið vegna krafna um ferskleika vöru við afhendingu. Staðreyndin er hins vegar sú að þróunin hefur leitt til þess að allir flutningar fara landleiðina því ekki hefur þótt hagkvæmt að aðeins hluti vöruflutninga sé á hafi úti. Allir flutningar fara því landleiðina með þeirri miklu umferð sem því fylgir og ómældu sliti á vegakerfinu. Þessir flutningabílar eru allt að 50 tonn fullhlaðnir á meðan meðalfólksbíllinn er innan við 2 tonn. Hver maður sér hina auknu slysahættu sem af þessu hefur hlotist. Það er því löngu tímabært að kanna kosti þess að niðurgreiða strandsiglingar með opinberu fé því talsverður sparnaður hlýtur að koma á móti vegna minna slits á vegakerfi landsmanna og vegna minni slysahættu. Þetta er sú alvarlega staðreynd sem blasir við okkar í dag – flutningar á vörum og sjávarfangi fara þvers og kruss um þjóðvegi landsins, flestir með viðkomu í höfuðborginni, og aldrei kemur Sundabraut. 

Hefjumst handa við tvöföldun þjóðveganna til og frá Reykjavík

Ég tel að á meðan samgönguráðherra er að velta fyrir sér legu Sundabrautar og því hvort innheimta eigi veggjald vegna þeirrar framkvæmdar þá gæti hann byrjað að gera vegina til og frá höfuðborginni sómasamlega. Hann gæti byrjað nú þegar að tvöfalda akreinar frá Borgarnesi að Reykjavík, þ.e. að þeim stað sem Sundabraut kemur upp á Kjalarnes. Vesturlandsvegur í þeirri mynd sem hann er í nú gengur ekki og þolir enga bið. Hið sama á við um Suðurlandsveg til Selfoss. Við höfum horft upp á svo mörg alvarleg slys á þessum vegaköflum undanfarin ár og alltaf þyngist umferðin. 

Landsmenn eru orðnir langþreyttir á aðgerðaleysi samgönguyfirvalda og vilja skýr svör og ákvarðanir. 

Því segi ég vaknaðu herra samgönguráðherra. Slysin gera ekki boð á undan sér. 

Þórir Ingþórsson

Esjugrund 52

116 Kjalarnesi

Marta Guðjónsdóttir fulltrúi sjálfstæðismanna í Hverfaráði Kjalarness skrifaði grein sem birtist í Morgunblaðinu þriðjudaginn 28. mars 2006.

{mosimage}

Kjalarnesið - Vítaverð vanræksla R-listans

Ég hef setið í hverfisráði Kjalarness á þessu kjörtímabili og fylgst þar með þeim vinnubrögðum R-listans er lúta að málefnum íbúanna. Þau vinnubrögð geta ekki fengið aðra umsögn en vítaverð vanræksla. Tekið hefur verið á brýnustu hagsmuna- og öryggismálum íbúanna með fullkomnu sinnuleysi og framtaksleysi og endalausum innantómum loforðum sem flest, ef ekki öll, hafa lent upp í erminni.

Kjalnesingar hlunnfarnir

Sú var tíðin, 1998, að fyrrverandi borgarstjóri, Ingibjörg Sólrún Gísladóttir, hafði uppi fjálglega frasa um gagnkvæma hagsmuni, beggja sveitarfélaganna, Reykjavíkur og Kjalarness, af sameiningunni.

En nú er öldin önnur: R-listanum hefur ekki þótt neitt sjálfsagðara en að svíkja flest loforð gagnvart Kjalnesingum og brjóta á þeim samninga, m.a. þann samning sem sveitarfélögin gerðu með sér við sameininguna. Kjalnesingar hafa svo sannarlega fengið að reyna að þeir eru olnbogabarn borgarinnar. Nú er svo komið að margir málsmetandi Kjalnesingar, telja sig og sveitunga sína hafa heldur betur verið hlunnfarna, og eru farnir að efast um réttmæti sameiningarinnar.

Öryggismál í ólestri

Kjalarnesið er beinlínis lífshættulegt íbúasvæði, börnum, unglingum og fullorðnum. Það er oft stórhættulegt ökumönnum og farþegum þeirra að hægja mikið á sér á Vesturlandsveginum og beygja síðan inn í Grundarhverfið vegna ógnarhraða og sívaxandi umferðar, sífellt stærri og fleiri vöruflutningabíla, að ekki sé nú talað um aðra og fáfarnari afleggjara Vesturlandsvegar á Kjalarnesi.

Sjálfstæðismenn í umhverfisráði lögðu fram tillögur um úrbætur í umferðaröryggismálum á Kjalarnesi 22. febrúar sl., en R-listinn frestaði tillögunni. Það er dæmigerð afstaða þeirra þegar málefni Kjalarness eru annars vegar.

Börn og unglingar á Kjalarnesi hafa reynt eftir megni að leika knattspyrnu í moldarsvaði meðfram Vesturlandsveginum þar sem umferðarþunginn er gífurlegur. Þar er ekki einu sinni rolluheld girðing og svo stutt í þjóðveginn að boltinn fer oft út á og yfir veginn. Börnin og unglingarnir hafa þolinmóð beðið eftir, einum einasta, þokkalegum sparkvelli frá því slíkum velli var lofað fyrir tveimur árum. En þar er líklega til of mikils mælst, enda bólar ekkert á vellinum.

Margsvikin loforð

Meira en helmingur vegakerfisins á Kjalarnesinu er malarvegir eins og tíðkuðust í Reykjavík áður en Geir Hallgrímsson, þáverandi borgarstjóri, útrýmdi slíkum götum og vegum á sjöunda áratug síðustu aldar. Nýbyggingin við grunnskóla hverfisins, Klébergsskóla, heldur ekki vatni og hefur ekki gert það frá því hún var tekin í notkun.

Fjögur ár, samfleytt, frestaðist skólahald við Klébergsskóla vegna seinkunar á framkvæmdum við skólann. Skólalóð Klébergsskóla er algjörlega ófrágengin, þrátt fyrir margítrekuð loforð um frágang hennar. Leikskólinn sem upphaflega og réttilega átti að verða þriggja deilda, var minnkaður niður í tveggja deilda skóla með þeim afleiðingum að hann er nú þegar orðinn of lítill. Aðkoman að honum er kennslubókardæmi í slysagildrum fyrir börn og fullorðna.

Enn hefur ekki verið lokið við gangstéttagerð og ýmsan annan frágang við götur Grundarhverfis þó nú hafi í mörg ár tíðkast í Reykjavík og öðrum bæjarfélögum að ganga frá slíkum framkvæmdaatriðum áður en íbúar flytja í hið nýja hverfi. Og svona gæti ég lengi haldið áfram. Allt er á sömu bókina lært.

Korter fyrir kosningar

Ekkert af þessu er þó aðalatriðið hér: Aðalatriðið er sjálfumgleði og hroki þeirra fulltrúa R-listans sem fimmtudaginn 23. mars sl. létu loks draga sig upp á Kjalarnes á kosningafund, korter fyrir kosningar, hlusta þar á umkvartanir íbúanna, - en tóku síðan til máls og töluðu fjálglega um sínar fallegu framtíðarhugsjónir, en létu umkvartanirnar íbúanna sem vind um eyru þjóta.

Slík framkoma sýnir fádæma valdhroka og er því frágangssök.

Það er athyglisvert, að mörg - jafnvel flest - þeirra úrlausnarefna sem hér koma til álita, kosta borgina óverulegar fjárhæðir miðað við öryggishagsmuni Kjalnesinga. Spurningin snýst því ekki um fjármuni, heldur áhuga á velferð borgaranna og að staðið sé við gerða samninga.

Við sjálfstæðismenn teljum það sjálfsagða skyldu okkar að standa við samninga og gefin loforð. Við viljum láta verkin tala, teljum það skyldu okkar að hlusta á íbúa borgarinnar, forgangsraða verkefnum og framkvæma án tafar það sem er aðkallandi.og varðar öryggi borgarbúa. Við munum því standa við þau fyrirheit á Kjalarnesinu sem R-listinn hefur svikið.

Greinin birtist í Morgunblaðinu þriðjudaginn 28. mars 2006.