Þegar húsvörður Klébergsskóla hringdi eftir snjóruðningi í morgun til að hreinsa aðkomu og bílastæði við skólann var gripið í tómt því snjóruðningstæki Kjalnesinga var í gær sent niður í bæ til að moka íbúðargötur niður í 101.

Í morgun komst skólabíllinn ekki leiðar sinnar og nánast var ófært fyrir strætóinn við Olís sjoppuna. Þá var ófært fyrir litla bíla á stofnbrautinni milli Búagrundar og Helgugrundar. Er verði að leggja niður þjónustu áhaldahússins við íbúa Kjalarness. Hvers vegna er mikilvægara að starfsmaður áhaldahúss Kjalnesinga hreinsi íbúðargötur í póstnúmeri 101 heldur en að halda opinni aðkomu að opinberum byggingum?
Þegar dregið er úr þjónustu er það yfirleitt vegna fólksfækkunar en í okkar tilviki er ekki hægt að bera því við þar sem íbúafjöldi Kjalarness hefur nánast tvöfaldast frá sameiningu sveitarfélaganna fyrir liðlega áratug. Af þessu má sjá að það er afar mikilvægt að Kjalnesingar standi vörð um þá þjónustu sem hefur verið til staðar á Kjalarnesi.

Framvegis verða endurvinnslustöðvar Sorpu opnaðar tveimur klukkustundum seinna um helgar en verið hefur. Þær verða opnaðar klukkan 12 á hádegi en ekki klukkan 10. Áfram verður opið til klukkan 18.30 og engin önnur röskun verður á þjónustunni.

Stytting á helgarafgreiðslutíma er liður í að lækka rekstrarkostnað, segir í fréttatilkynningu frá Sorpu. Í tilkynningunni kemur fram að tiltölulega fáir nýti sér tímann milli klukkan 10 og 12 um helgar. Áður hefur komið fram að loka eigi endurvinnslustöðinni á  Kjalarnesi en samkvæmt upplýsingum frá Sorpu sýna reynslutölur að Kjalarnesstöðin er lítið notuð.

Frétt af visi.is

Kompudagar á Kjalarnesi 5. mars 2011

Taktu til á háaloftinu, í skápunum og undir rúmum. Ef það hefur ekki verið notað lengi gæti verið sniðugt að losna við það fyrir smá pening.  Gamalt hjá þér.... nýtt fyrir aðra. Einnig góður vettvangur til að selja nýja vöru, handverk eða hönnun.

Íbúar á Kjalarnesi ætla að hafa gaman saman í Fólkvangi þann 5. mars n.k. frá kl. 13:00 til 18:00.
Kvenfélagið Esja verður kaffihúsið opið allan tímann. Endilega komið, kíkið, hittið aðra og upplifið kaffihúsa- og kolaportsstemmingu.

• Frábært verð á básum, aðeins 1.000.- kr. 
• Verð á litlum básum fyrir grunnskólanema aðeins 500.- kr.

Hvetjum foreldra til að aðstoða börnin við að koma gömlu dóti í verð. Básapantanir hjá Írisi í síma 868-1573 eða með tölvupósti á irisfjola@simnet.is  Kíkið líka á Kompudaga á Facebook. 

Höfum gaman saman í hverfinu okkar ;o)

Ég hvet alla sem ætla að mæta og eiga notalegan dag á Kjalarnesinu sem og þá sem ætla að vera með bása að láta póstinn berast á vini og vandamenn, þannig náum við til sem flestra. Þeir sem eru á facebook geta farið inná viðburðinn og boðið sínum vinum, einnig megið þið gjarnan deila viðburðinum á ykkar síðu.

Fundargerð íbúafundar í Fólkvangi miðvikudaginn 23. febrúar vegna áforma Sorpu að loka endurvinnslustöðinni á Kjalarnesi.

Fundarstjóri Guðni Indriðason setur fundinn og fyrstur tekur til máls formaður ÍK, Ásgeir Harðarson.

Ásgeir fer yfir forsögu málsins, 300 heimili sem hafa skilað 136 tonnum á ári í endurvinnslustöðina á Kjalarnesi þar sem 2 starfsmenn vinna samtals 60 klst. á mánuði. Sorpa á að spara 12 milljónir á þessu ári og stjórn Sorpu áætlar að ná 4ra
milljóna sparnaði með lokun. Þeim er alveg sama þó það kosti íbúana á svæðinu 8 milljónir að keyra ruslið á einkabílum sínum. Rök yfirvalda hafa m.a. verið: Þetta er í leiðinni fyrir Kjalnesinga þegar þeir fara að versla í matinn.

Verið er að brjóta samning sem var gerður við sameiningu Kjalarneshrepps og Reykjavíkur en þar var kveðið á að gámastöð yrði starfrækt áfram á Kjalanesi eftir sameiningu.· Ásgeir spyr að lokum: „Þurfum við að hafa af þessu áhyggjur? Ætlum við að gera
eitthvað? Ætlum við að grípa til aðgerða?“

Fundarstjóri gefur orðið er frjálst.

Lagt er til að íbúasamtökin ráði lögfræðing sem leiði málarekstur gegn borginni og hóti lokun Álfsness. Rætt hefur verið við 2
lögfræðinga sem báðir voru sammála um að þetta væru samningsriftur. Sé farið að keyra ruslið á kerrum komu fram áhyggjur af öryggismálum og minnist á að oft eru kerruflök í vegköntum á leiðinni milli Kjalarness og Mosfellsbæjar eftir óveður. Þá er bent á nýtt endurvinnslugjald sem verið er að setja á íbúa.
Íbúar Kjalarness eru einungis 0,7% af höfuðborgarbúum en erum látin taka 30% af niðurskurðinum. 12 milljónir er lítil tala miðað við margt annað sem er í gangi og einhver úr sal talaði um að það kostaði 7 milljónir að hafa bíl fyrir einhvern ráðamann en því mætti ekki breyta því þá væri verið að brjóta samninga. Þá er minnt á Grænfána stefnu leik- og grunnskólans og að þessi lokun
sé ekki í anda þeirrar stefnu. Nú er enn lengra á milli þess sem tunnur eru tæmdar og því er magn sorps við hirðingu meira en áður.

Fundargestum líst vel á að fá lögfræðinga í málið. Viðraðar voru hugmyndir um að loka Álfsnesinu með keðjum til að trufla sorpurðun þar og einnig að loka Sorpu á Kjalarnesi með keðjum svo ekki væri hægt að fjarlægja gámana. Varað er við neikvæðum móral út í okkur ef farið verður út í að tefja umferð á Vesturlandsvegi.

„Bláa bókin“ er samningur með undirritun ráðamanna á þeim tíma. Hvatt er til þess að íbúar Kjalarness sendi ráðamönnum tölvupósta.· Spurt er hvort Kjalarnes sé grænt? Er það vistvænt? Er það komið með vottorð?· Lagt er til að fá Guðrúnu Bergmann sem ráðgjafa en hún hafi unnið gott starf á Arnarstapa og komið þeim í grænt umhverfi. Sagt var frá því þegar gámastöðin á Kjalarnesi var ómönnuð að þá hafi gámarnir iðulega verið fullir því fleiri en Kjalnesingar hefðu hent í þá rusli. Þá voru einnig tilvik um að sendibílar hefðu jafnvel komið með rusl í þá frekar en að þurfa að greiða gjald til endurvinnslustöðva Sorpu í Reykjavík.

Fundamenn furða sig á að ekki sé hægt að halda út endurvinnslustöð í 800 manna samfélagi á Kjalarnesi fyrst það er hægt í 200
manna samfélagi í Kjósinni. Er mögulegt að fá lögbann á þessa lokun?

Mikilvægt er að skrifa ráðamönnum bréf og benda á þá stefnu sem verið er að móta um grænt Kjalarnesið og að þessi fyrirhugaða lokun væri fáránlegt skref í öfuga átt við grænu stefnuna. Einnig að við ættum bara að neita að fara með ruslið burt. Þá er spurt hvort fundurinn semji ekki ályktun sem send verði til allra viðeigandi aðila.

Eftir kaffihlé eru tvær tillögur að ályktun lagðar fram

Ályktun til borgarstjórnar:

Íbúafundur haldinn í Fólkvangi á Kjalarnesi þann 23. febrúar 2011 harmar það samningsbrot sem fyrirhuguð lokun endurvinnslustöðvar Sorpu við Norðurgrund á Kjalarnesi er.· Fundurinn skorar á borgarstjórn að virða gerða samninga vegna sameiningar Kjalarneshrepps og Reykjavíkurborgar dags. 11. maí 1997.

Ályktunin er borin undir fundinn og einróma samþykkt.

Ályktun til Íbúasamtaka Kjalarness:

Íbúafundur haldinn í Fólkvangi á Kjalarnesi þann 23. febrúar 2011 skorar á stjórn Íbúasamtaka Kjalarness að leita lögfræðiálits á broti á samningi um sameiningu Kjalarneshrepps og Reykjavíkurborgar, frá 11. maí 1997, varðandi lokun endurvinnslustöðvar Sorpu við Norðurgrund á Kjalarnesi.

Bent er á alvarleikan við ályktunina og að það fylgi því talsverður kostnaður að ráða lögfræðing. Fundurinn er samt enn á því að fara þá leið.· Rætt var um ódýrar eða ókeypis leiðir eins og borgarlögmann, umboðsmann Alþingis og Orator félag laganema.

Ályktunin er borin undir fundinn og einróma samþykkt

Ákveðið var að kalla saman aðgerðarhóp sem myndi skipuleggja og stýra aðgerðum.

Í hópinn völdust eftirfarandi einstaklingar:
Sigríður Pétursdóttur
Regina Jóhanna Guðlaugsdóttir
Bjarni Sighvatsson og
Magnús Ingi Magnússon stjórnarmaður í ÍK og sér um að kalla hópinn saman.
Jafnframt er öll stjórn ÍK með í aðgerðahópnum

Guðni Indriðason þakkar fundargestum fyrir komuna og eftir að hafa hvatt fundargesti til að nýta sér aðgengi og sambönd við fjölmiðafólk slítur Ásgeir fundi kl 22:10.

Mæting tæplega 60 manns.

Samstöðufundur verður á morgun sunnudaginn 27. febrúar kl 17:00 við endurvinnslustöð Sorpu á Kjalarnesi.

Á sama tíma og gert er sérstakt átak í flokkun heimilissorps hefur verið samþykkt að loka endurvinnslustöð Sorpu á Kjalarnesi. Sparnaður af þessu nemur um kr 4 millj. en alls hefur Sorpu verið gert að draga saman um kr. 12 millj á þessu ári. Þannig bera 0,5% íbúa höfðuborgarsvæðisins 30% af niðurskurði Sorpu. Við þessa lokun getur kostnaður íbúanna við að losna við endurvinnanlegt sorp numið allt að 8 millj. eða sem nemur tvöföldum fyrirhuguðum sparnaði. Um gámastöð á Kjalarnesi var samið við sameiningu Reykjavíkur og Kjalarness og er lokun þessarar stöðvar því brot á þeim samningi.

Til fjölmiðla

Kjalarnesi 26. febrúar 2011

Það var mikill samhugur á fjölmennum íbúafundi um málefni endurvinnslustöðvar Sorpu á Kjalarnesi þar sem fjölmörgum flötum var velt upp. Íbúum var ofarlega í huga þvílíkar andstæður það eru að vinna að grænfánaverkefnum í skólunum ásamt aukinni áherslu á flokkun á sama tíma og fyrirhugað sé að loka endurvinnslustöðinni hér á Kjalarnesi. Þá furðuðu fundarmenn sig á því hvernig mikið fámennara sveitarfélag í Kjós getur haldið úti fyrirmyndarþjónustu með endurvinnslustöð sem er með svipaðan opnunartíma og hér er. Við erum tilbúin að axla okkar niðurskurð eins og allir aðrir borgarbúar en óskum eftir að jafnræðis sé gætt og höfnum því að búa við lokanir þjónustustofnana hér á Kjalarnesi þegar aðrir borgarbúar búa einungis við skerta þjónustu t.d. í formi styttri opnunartíma.
Á fundinum var mikið rætt um samning um sameiningu Kjalarneshrepps og Reykjavíkurborgar frá 1997. Þar kemur fram að áfram skuli vera opin gámstaður á Kjalarnesi en nú er Reykjavíkurborg að brjóta þann samning án nokkurar tilraunar til samráðs við íbúa Kjalarness.

Fundurinn samþykkti tvær áskoranir, aðra til borgarstjórnar og hina til stjórnar Íbúasamtaka Kjalarness.

Eru þær eftirfarandi:

Íbúafundur haldinn í Fólkvangi á
Kjalarnesi þann 23. febrúar 2011 harmar það samningsbrot sem fyrirhuguð lokun
endurvinnslustöðvar Sorpu við Norðurgrund á Kjalarnesi er. Fundurinn skorar á
borgarstjórn að virða gerða samninga vegna sameiningar Kjalarneshrepps og
Reykjavíkurborgar dags. 11. maí 1997.

Íbúafundur haldinn í Fólkvangi á
Kjalarnesi þann 23. febrúar 2011 skorar á stjórn Íbúasamtaka Kjalarness að
leita lögfræðiálits á broti á samningi um sameiningu Kjalarneshrepps og
Reykjavíkurborgar, frá 11. maí 1997, varðandi lokun endurvinnslustöðvar Sorpu
við Norðurgrund á Kjalarnesi.

Á fundinum var stofnaður aðgerðarhópur sem vinnur með stjórn ÍK að því að halda þessari þjónustu áfram.

Á morgun sunnudaginn 27. febrúar kl. 17:00 stendur aðgerðarhópurinn fyrir mótmæla og samstöðufundi við endurvinnslustöð Sorpu á Kjalarnesi til að vekja athygli á mikilvægi þessarar þjónustu fyrir Kjalnesinga.

Allir eru hvattir til að koma í endurvinnslustöð Sorpu á Kjalarnesi sunnudaginn 27. febrúar kl 17:00. Ef við bregðumst ekki við er þetta hugsanlega síðasta sunnudagsopnun Sorpu á Kjalarnesi.

Mikilvægt er að sem flestir komi og sýni samstöðu í verki. Sýnum stjórnendum borgarinnar að við viljum lausnir en ekki lokun. Að sjálfsögðu tökum við á okkur birgðar vegna niðurskurðar eins og aðrir samborgarar okkar en við höfnum því að Sorpu verði lokað.

Kjalnesingar - stöndum saman og mætum kl 17:00

Aðkoma opinberra aðila

Kynning og undirbúningur málsins

En af hverju Ísland, og af hverju Hvalfjörður?

Af ábyrgð og ímynd

Samgöngur til og frá höfuðborginni

Að undanförnu hafa átt sér stað talsverðar umræður um samgöngumál og umferðaröryggi. Sú umræða hefur oftar en ekki skapast í framhaldi af slysum eða umferðaróhöppum og inn í þá umræðu blandast eðlilega samgöngur til og frá Reykjavík. Það er því hryggilegt að sjá hversu litla áherslu stjórnvöld leggja á frekari samgöngubætur til og frá höfuðborginni okkar. Samtök Sveitarfélaga á Vesturlandi hafa síðastliðin ár lagt mikla áherslu á mikilvægi tvöföldunar á þjóðvegi 1 frá Holtavörðuheiði að Kollafirði. Hafa samtökin bent á mikilvægi þess að hefjast framkvæmda sem fyrst vegna þeirrar miklu aukningar á þungaflutningum á þessum slóðum síðastliðin ár. Hafa önnur samtök, þar á meðal íbúasamtökin á Kjalanesi sem og Hverfisráð Kjalarness, sent frá sér ályktanir sem snúa að þessum málum. 

Slit og slysahætta

Í dag er ekkert flutningaskip sem siglir úti fyrir ströndum Íslands með viðkomu í helstu höfnum hringinn í kringum landið. Það er eðlilegt að vöruflutningar hafi færst í auknum mæli inn á þjóðvegakerfið vegna krafna um ferskleika vöru við afhendingu. Staðreyndin er hins vegar sú að þróunin hefur leitt til þess að allir flutningar fara landleiðina því ekki hefur þótt hagkvæmt að aðeins hluti vöruflutninga sé á hafi úti. Allir flutningar fara því landleiðina með þeirri miklu umferð sem því fylgir og ómældu sliti á vegakerfinu. Þessir flutningabílar eru allt að 50 tonn fullhlaðnir á meðan meðalfólksbíllinn er innan við 2 tonn. Hver maður sér hina auknu slysahættu sem af þessu hefur hlotist. Það er því löngu tímabært að kanna kosti þess að niðurgreiða strandsiglingar með opinberu fé því talsverður sparnaður hlýtur að koma á móti vegna minna slits á vegakerfi landsmanna og vegna minni slysahættu. Þetta er sú alvarlega staðreynd sem blasir við okkar í dag – flutningar á vörum og sjávarfangi fara þvers og kruss um þjóðvegi landsins, flestir með viðkomu í höfuðborginni, og aldrei kemur Sundabraut. 

Hefjumst handa við tvöföldun þjóðveganna til og frá Reykjavík

Ég tel að á meðan samgönguráðherra er að velta fyrir sér legu Sundabrautar og því hvort innheimta eigi veggjald vegna þeirrar framkvæmdar þá gæti hann byrjað að gera vegina til og frá höfuðborginni sómasamlega. Hann gæti byrjað nú þegar að tvöfalda akreinar frá Borgarnesi að Reykjavík, þ.e. að þeim stað sem Sundabraut kemur upp á Kjalarnes. Vesturlandsvegur í þeirri mynd sem hann er í nú gengur ekki og þolir enga bið. Hið sama á við um Suðurlandsveg til Selfoss. Við höfum horft upp á svo mörg alvarleg slys á þessum vegaköflum undanfarin ár og alltaf þyngist umferðin. 

Landsmenn eru orðnir langþreyttir á aðgerðaleysi samgönguyfirvalda og vilja skýr svör og ákvarðanir. 

Því segi ég vaknaðu herra samgönguráðherra. Slysin gera ekki boð á undan sér. 

Þórir Ingþórsson

Esjugrund 52

116 Kjalarnesi

Marta Guðjónsdóttir fulltrúi sjálfstæðismanna í Hverfaráði Kjalarness skrifaði grein sem birtist í Morgunblaðinu þriðjudaginn 28. mars 2006.

{mosimage}

Kjalarnesið - Vítaverð vanræksla R-listans

Ég hef setið í hverfisráði Kjalarness á þessu kjörtímabili og fylgst þar með þeim vinnubrögðum R-listans er lúta að málefnum íbúanna. Þau vinnubrögð geta ekki fengið aðra umsögn en vítaverð vanræksla. Tekið hefur verið á brýnustu hagsmuna- og öryggismálum íbúanna með fullkomnu sinnuleysi og framtaksleysi og endalausum innantómum loforðum sem flest, ef ekki öll, hafa lent upp í erminni.

Kjalnesingar hlunnfarnir

Sú var tíðin, 1998, að fyrrverandi borgarstjóri, Ingibjörg Sólrún Gísladóttir, hafði uppi fjálglega frasa um gagnkvæma hagsmuni, beggja sveitarfélaganna, Reykjavíkur og Kjalarness, af sameiningunni.

En nú er öldin önnur: R-listanum hefur ekki þótt neitt sjálfsagðara en að svíkja flest loforð gagnvart Kjalnesingum og brjóta á þeim samninga, m.a. þann samning sem sveitarfélögin gerðu með sér við sameininguna. Kjalnesingar hafa svo sannarlega fengið að reyna að þeir eru olnbogabarn borgarinnar. Nú er svo komið að margir málsmetandi Kjalnesingar, telja sig og sveitunga sína hafa heldur betur verið hlunnfarna, og eru farnir að efast um réttmæti sameiningarinnar.

Öryggismál í ólestri

Kjalarnesið er beinlínis lífshættulegt íbúasvæði, börnum, unglingum og fullorðnum. Það er oft stórhættulegt ökumönnum og farþegum þeirra að hægja mikið á sér á Vesturlandsveginum og beygja síðan inn í Grundarhverfið vegna ógnarhraða og sívaxandi umferðar, sífellt stærri og fleiri vöruflutningabíla, að ekki sé nú talað um aðra og fáfarnari afleggjara Vesturlandsvegar á Kjalarnesi.

Sjálfstæðismenn í umhverfisráði lögðu fram tillögur um úrbætur í umferðaröryggismálum á Kjalarnesi 22. febrúar sl., en R-listinn frestaði tillögunni. Það er dæmigerð afstaða þeirra þegar málefni Kjalarness eru annars vegar.

Börn og unglingar á Kjalarnesi hafa reynt eftir megni að leika knattspyrnu í moldarsvaði meðfram Vesturlandsveginum þar sem umferðarþunginn er gífurlegur. Þar er ekki einu sinni rolluheld girðing og svo stutt í þjóðveginn að boltinn fer oft út á og yfir veginn. Börnin og unglingarnir hafa þolinmóð beðið eftir, einum einasta, þokkalegum sparkvelli frá því slíkum velli var lofað fyrir tveimur árum. En þar er líklega til of mikils mælst, enda bólar ekkert á vellinum.

Margsvikin loforð

Meira en helmingur vegakerfisins á Kjalarnesinu er malarvegir eins og tíðkuðust í Reykjavík áður en Geir Hallgrímsson, þáverandi borgarstjóri, útrýmdi slíkum götum og vegum á sjöunda áratug síðustu aldar. Nýbyggingin við grunnskóla hverfisins, Klébergsskóla, heldur ekki vatni og hefur ekki gert það frá því hún var tekin í notkun.

Fjögur ár, samfleytt, frestaðist skólahald við Klébergsskóla vegna seinkunar á framkvæmdum við skólann. Skólalóð Klébergsskóla er algjörlega ófrágengin, þrátt fyrir margítrekuð loforð um frágang hennar. Leikskólinn sem upphaflega og réttilega átti að verða þriggja deilda, var minnkaður niður í tveggja deilda skóla með þeim afleiðingum að hann er nú þegar orðinn of lítill. Aðkoman að honum er kennslubókardæmi í slysagildrum fyrir börn og fullorðna.

Enn hefur ekki verið lokið við gangstéttagerð og ýmsan annan frágang við götur Grundarhverfis þó nú hafi í mörg ár tíðkast í Reykjavík og öðrum bæjarfélögum að ganga frá slíkum framkvæmdaatriðum áður en íbúar flytja í hið nýja hverfi. Og svona gæti ég lengi haldið áfram. Allt er á sömu bókina lært.

Korter fyrir kosningar

Ekkert af þessu er þó aðalatriðið hér: Aðalatriðið er sjálfumgleði og hroki þeirra fulltrúa R-listans sem fimmtudaginn 23. mars sl. létu loks draga sig upp á Kjalarnes á kosningafund, korter fyrir kosningar, hlusta þar á umkvartanir íbúanna, - en tóku síðan til máls og töluðu fjálglega um sínar fallegu framtíðarhugsjónir, en létu umkvartanirnar íbúanna sem vind um eyru þjóta.

Slík framkoma sýnir fádæma valdhroka og er því frágangssök.

Það er athyglisvert, að mörg - jafnvel flest - þeirra úrlausnarefna sem hér koma til álita, kosta borgina óverulegar fjárhæðir miðað við öryggishagsmuni Kjalnesinga. Spurningin snýst því ekki um fjármuni, heldur áhuga á velferð borgaranna og að staðið sé við gerða samninga.

Við sjálfstæðismenn teljum það sjálfsagða skyldu okkar að standa við samninga og gefin loforð. Við viljum láta verkin tala, teljum það skyldu okkar að hlusta á íbúa borgarinnar, forgangsraða verkefnum og framkvæma án tafar það sem er aðkallandi.og varðar öryggi borgarbúa. Við munum því standa við þau fyrirheit á Kjalarnesinu sem R-listinn hefur svikið.

Greinin birtist í Morgunblaðinu þriðjudaginn 28. mars 2006.