Nú er íþróttastarfið hafið og gaman frá því að segja að þátttaka er enn að aukast. Við höfum nú fengið badminton þjálfara sem er tilbúinn til að hefja starf hjá okkur og væntum við góðra hluta þar.

Knattspyrnan blómstrar og æfingatímum hefur fjölgað. Við viljum nota tækifærið og hvetja fleiri stúlkur til að láta sjá sig í boltanum en nú styttist í að náist í lið í kvennaflokki.  Enn er verið að leita að sundþjálfara og er nokkur möguleiki á að það gangi upp á næstunni.

Búið er að skrá inná frístundakortið þau börn sem eru að iðka íþróttir hjá U.M.F.K. inná www.reykjavik.is og biðjum við foreldra um að fara inn á vefinn og samþykkja sem fyrst. Þau börn sem ekki eru skráð en vilja nýta frístundakortið geta sent tölvupóst með nafni og kennitölu barns, svo og íþróttagrein á netfangið gunnagrims@simnet.isAðrir þátttakendur eru hvattir til að ganga frá greiðslum sem fyrst. Hægt er að ganga frá greiðslu í Íþróttamiðstöðinni (minni á 20% systkinaafslátt) eða leggja inná reikn. U.M.F.K. sem er : 0315-26-030402 kt: 700895-2979Þá er mikilvægt að skrá nafn barnsins inná skýringar með greiðslu, annars kemur ekki fram hver greiðir.

Badminton

Við höfum nú fengið þjálfara fyrir badminton! Æfingar í badminton hefjast, ef þátttaka verður næg, og verða þær á þriðjudögum og fimmtudögum kl. 15.00-16.00. Við hvetjum alla krakka, ekki síst eldri krakka, sem áhuga hafa á þessari skemmtilegu íþrótt að skrá sig. Þjálfari verður Arthur Jósefsson en hann hefur æft badminton í 15 ár og er að ljúka námi frá Íþróttakennaraskólanum.Prufutími verður haldinn fimmtudaginn 16. október kl. 15.00-16.00 í Íþróttamiðstöðinni og skráningablöð munu liggja frammi í afgreiðslunni til föstudagskvölds. Skráning er bindandi. Æfingagjald fyrir badminton verður 13.000,-kr fram að jólum.

Knattspyrna

Fjölgun hefur orðið í 7.flokki og fögnum við því, en það eru krakkar fæddir 2001 og 2002. Þess vegna höfum við fjölgað æfingum þannig að 7. flokkur æfir nú tvisvar sinnum í viku á miðvikudögum kl. 15.00-16.00 og laugardögum kl. 9.00-10.00. Æfingagjald fyrir þau fram að jólum er kr. 13.000,-. Þeir krakkar sem eru í 6.flokki æfa nú þrisvar í viku, á mánudögum kl. 16.00-17.00 á gervigrasi, miðvikudögum kl. 16.00-17.00 og laugardögum kl. 10.00-11.00 í Íþróttamiðstöðinni. Æfingagjald hjá þeim er kr. 15.000,-. Krakkar í 5. og 4.flokki æfa einnig þrisvar sinnum í viku á mánudögum kl. 17.00-18.00 á gervigrasi, á miðvikudögum kl. 17.00-18.00 og laugardögum kl. 11.00-12.00 í Íþróttamiðstöðinni. Æfingagjald hjá þeim er 15.000,- fram að jólum og eru foreldrar beðnir um að ganga frá greiðslu sem fyrst.  Þjálfarar eru Kiddi, gsm 897-4418  og Þórður, gsm 898-7350.

Fimleikar

Nokkrar breytingar höfum við gert á æfingatíma í fimleikunum. Æft er á laugardögum kl. 12.00-13.00 fyrir yngri og 12.45-14.00 fyrir eldri og annan hvern sunnudag í Ármannsheimilinu kl. 12.00-13.00 fyrir yngri og 12.45.-14.00 fyrir eldri. Æfingagjöld fyrir fimleikana er 11.000,- kr fram að jólum.Við viljum sérstaklega minna foreldra á að skrá börn sín með fullu nafni og kennitölu á eyðublöðin sem liggja frammi í Íþróttamiðstöðinni, og ganga frá greiðslu æfingagjalda sem fyrst.Þjálfari í fimleikunum er Maríanna Þórðardóttir,  gsm 697-3474

Með bestu kveðjum,f.h UMFKFríða Halldórsd og Guðrún Grímsdóttir gjaldkeri

Orkustofnun hefur sent frá sér umsögn um frummatsskýrslu Björgunar ehf vegna efnistöku á hafsbotni í Kollafirði , Faxaflóa.

Í skýrslunni er m.a. rekin aðdragandinn að umhverfismatinu hjá Björgun ehf og framkoma þeirra gagnvart kröfunni um umhverfismat.

Skýrsluna má fina á vef Orkustofnunar os.is en einnig beint HÉR.

Búið er að setja á laggirnar nágrannavörslu í Grundarhverfi á Kjalarnesi en þetta er í fyrsta skipti sem farið er af stað með slíkt átak í heilu borgarhverfi. Um er að ræða samstarfsverkefni milli íbúa hverfisins, lögreglunnar og Reykjavíkurborgar. Áður hefur nágrannavarsla farið fram í einstökum götum borgarinnar og almennt hefur mikil ánægja verið með það.

Marta Guðjónsdóttir, formaður hverfisráðs Kjalarness, segir verkefnið fyrst og fremst hugsað sem forvörn en lítið sé um innbrot á Kjalarnesi. „Markmiðið með verkefninu er í raun að aðstoða borgarbúa við að stuðla að auknu öryggi og taka höndum saman um að sporna gegn innbrotum og eignatjóni.“

Marta segir að þótt sjálfsprottin nágrannavarsla finnist víða, fari formleg nágrannavarsla þannig fram að í upphafi sé haldinn undirbúningsfundur með íbúum þar sem þeir fái afhenta sérstaka límmiða til að setja í rúður í húsum sínum en á þá hefur verið prentað merki nágrannavörslunnar sem er samræmt um landið allt.

Þá eru sett upp sérstök nágrannavörsluskilti í hverja einustu götu þar sem nágrannavarslan er fyrir hendi. Sérstakir götustjórar eru valdir sem þjóna hlutverki tengiliða lögreglu og íbúa. Hlutverk þeirra er að upplýsa nágranna sína eigi eitthvað óeðlilegt sér stað og upplýsa einnig lögreglu verði þeir varir við grunsamlegar mannaferðir.

Frétt af mbl.is

Kristján Möller, samgönguráðherra, vill halda opnum þeim möguleika að byggja hábrú yfir Sundin í Reykjavík og yfir á Kjalarnes, þótt vilji borgaryfirvalda standi til að gera göng.

Þetta kom fram í viðtali við Kristján í Kastljósi að loknum fréttum Sjónvarps í kvöld. Þessa dagana er verið að gera umhverfismat fyrir göng en ráðherra bendir á að brúarsmíði gæti orðið mun ódýrari.

Ráðherra segir hugmynd um hábrú hafa verið slegna út af borðinu vegna kostnaðar sem var metinn á 19 milljarða króna. Kostnaður við göng sé nú metinn á 24 milljarða króna. Kristján bendir á að heildarkostnaður við þetta verkefni gæti orðið hátt í 40 milljarðar og huga verði að hagkvæmustu lausninni til langrar framtíðar.

Af vef ruv.is

Aðkoma opinberra aðila

Kynning og undirbúningur málsins

En af hverju Ísland, og af hverju Hvalfjörður?

Af ábyrgð og ímynd

Samgöngur til og frá höfuðborginni

Að undanförnu hafa átt sér stað talsverðar umræður um samgöngumál og umferðaröryggi. Sú umræða hefur oftar en ekki skapast í framhaldi af slysum eða umferðaróhöppum og inn í þá umræðu blandast eðlilega samgöngur til og frá Reykjavík. Það er því hryggilegt að sjá hversu litla áherslu stjórnvöld leggja á frekari samgöngubætur til og frá höfuðborginni okkar. Samtök Sveitarfélaga á Vesturlandi hafa síðastliðin ár lagt mikla áherslu á mikilvægi tvöföldunar á þjóðvegi 1 frá Holtavörðuheiði að Kollafirði. Hafa samtökin bent á mikilvægi þess að hefjast framkvæmda sem fyrst vegna þeirrar miklu aukningar á þungaflutningum á þessum slóðum síðastliðin ár. Hafa önnur samtök, þar á meðal íbúasamtökin á Kjalanesi sem og Hverfisráð Kjalarness, sent frá sér ályktanir sem snúa að þessum málum. 

Slit og slysahætta

Í dag er ekkert flutningaskip sem siglir úti fyrir ströndum Íslands með viðkomu í helstu höfnum hringinn í kringum landið. Það er eðlilegt að vöruflutningar hafi færst í auknum mæli inn á þjóðvegakerfið vegna krafna um ferskleika vöru við afhendingu. Staðreyndin er hins vegar sú að þróunin hefur leitt til þess að allir flutningar fara landleiðina því ekki hefur þótt hagkvæmt að aðeins hluti vöruflutninga sé á hafi úti. Allir flutningar fara því landleiðina með þeirri miklu umferð sem því fylgir og ómældu sliti á vegakerfinu. Þessir flutningabílar eru allt að 50 tonn fullhlaðnir á meðan meðalfólksbíllinn er innan við 2 tonn. Hver maður sér hina auknu slysahættu sem af þessu hefur hlotist. Það er því löngu tímabært að kanna kosti þess að niðurgreiða strandsiglingar með opinberu fé því talsverður sparnaður hlýtur að koma á móti vegna minna slits á vegakerfi landsmanna og vegna minni slysahættu. Þetta er sú alvarlega staðreynd sem blasir við okkar í dag – flutningar á vörum og sjávarfangi fara þvers og kruss um þjóðvegi landsins, flestir með viðkomu í höfuðborginni, og aldrei kemur Sundabraut. 

Hefjumst handa við tvöföldun þjóðveganna til og frá Reykjavík

Ég tel að á meðan samgönguráðherra er að velta fyrir sér legu Sundabrautar og því hvort innheimta eigi veggjald vegna þeirrar framkvæmdar þá gæti hann byrjað að gera vegina til og frá höfuðborginni sómasamlega. Hann gæti byrjað nú þegar að tvöfalda akreinar frá Borgarnesi að Reykjavík, þ.e. að þeim stað sem Sundabraut kemur upp á Kjalarnes. Vesturlandsvegur í þeirri mynd sem hann er í nú gengur ekki og þolir enga bið. Hið sama á við um Suðurlandsveg til Selfoss. Við höfum horft upp á svo mörg alvarleg slys á þessum vegaköflum undanfarin ár og alltaf þyngist umferðin. 

Landsmenn eru orðnir langþreyttir á aðgerðaleysi samgönguyfirvalda og vilja skýr svör og ákvarðanir. 

Því segi ég vaknaðu herra samgönguráðherra. Slysin gera ekki boð á undan sér. 

Þórir Ingþórsson

Esjugrund 52

116 Kjalarnesi

Marta Guðjónsdóttir fulltrúi sjálfstæðismanna í Hverfaráði Kjalarness skrifaði grein sem birtist í Morgunblaðinu þriðjudaginn 28. mars 2006.

{mosimage}

Kjalarnesið - Vítaverð vanræksla R-listans

Ég hef setið í hverfisráði Kjalarness á þessu kjörtímabili og fylgst þar með þeim vinnubrögðum R-listans er lúta að málefnum íbúanna. Þau vinnubrögð geta ekki fengið aðra umsögn en vítaverð vanræksla. Tekið hefur verið á brýnustu hagsmuna- og öryggismálum íbúanna með fullkomnu sinnuleysi og framtaksleysi og endalausum innantómum loforðum sem flest, ef ekki öll, hafa lent upp í erminni.

Kjalnesingar hlunnfarnir

Sú var tíðin, 1998, að fyrrverandi borgarstjóri, Ingibjörg Sólrún Gísladóttir, hafði uppi fjálglega frasa um gagnkvæma hagsmuni, beggja sveitarfélaganna, Reykjavíkur og Kjalarness, af sameiningunni.

En nú er öldin önnur: R-listanum hefur ekki þótt neitt sjálfsagðara en að svíkja flest loforð gagnvart Kjalnesingum og brjóta á þeim samninga, m.a. þann samning sem sveitarfélögin gerðu með sér við sameininguna. Kjalnesingar hafa svo sannarlega fengið að reyna að þeir eru olnbogabarn borgarinnar. Nú er svo komið að margir málsmetandi Kjalnesingar, telja sig og sveitunga sína hafa heldur betur verið hlunnfarna, og eru farnir að efast um réttmæti sameiningarinnar.

Öryggismál í ólestri

Kjalarnesið er beinlínis lífshættulegt íbúasvæði, börnum, unglingum og fullorðnum. Það er oft stórhættulegt ökumönnum og farþegum þeirra að hægja mikið á sér á Vesturlandsveginum og beygja síðan inn í Grundarhverfið vegna ógnarhraða og sívaxandi umferðar, sífellt stærri og fleiri vöruflutningabíla, að ekki sé nú talað um aðra og fáfarnari afleggjara Vesturlandsvegar á Kjalarnesi.

Sjálfstæðismenn í umhverfisráði lögðu fram tillögur um úrbætur í umferðaröryggismálum á Kjalarnesi 22. febrúar sl., en R-listinn frestaði tillögunni. Það er dæmigerð afstaða þeirra þegar málefni Kjalarness eru annars vegar.

Börn og unglingar á Kjalarnesi hafa reynt eftir megni að leika knattspyrnu í moldarsvaði meðfram Vesturlandsveginum þar sem umferðarþunginn er gífurlegur. Þar er ekki einu sinni rolluheld girðing og svo stutt í þjóðveginn að boltinn fer oft út á og yfir veginn. Börnin og unglingarnir hafa þolinmóð beðið eftir, einum einasta, þokkalegum sparkvelli frá því slíkum velli var lofað fyrir tveimur árum. En þar er líklega til of mikils mælst, enda bólar ekkert á vellinum.

Margsvikin loforð

Meira en helmingur vegakerfisins á Kjalarnesinu er malarvegir eins og tíðkuðust í Reykjavík áður en Geir Hallgrímsson, þáverandi borgarstjóri, útrýmdi slíkum götum og vegum á sjöunda áratug síðustu aldar. Nýbyggingin við grunnskóla hverfisins, Klébergsskóla, heldur ekki vatni og hefur ekki gert það frá því hún var tekin í notkun.

Fjögur ár, samfleytt, frestaðist skólahald við Klébergsskóla vegna seinkunar á framkvæmdum við skólann. Skólalóð Klébergsskóla er algjörlega ófrágengin, þrátt fyrir margítrekuð loforð um frágang hennar. Leikskólinn sem upphaflega og réttilega átti að verða þriggja deilda, var minnkaður niður í tveggja deilda skóla með þeim afleiðingum að hann er nú þegar orðinn of lítill. Aðkoman að honum er kennslubókardæmi í slysagildrum fyrir börn og fullorðna.

Enn hefur ekki verið lokið við gangstéttagerð og ýmsan annan frágang við götur Grundarhverfis þó nú hafi í mörg ár tíðkast í Reykjavík og öðrum bæjarfélögum að ganga frá slíkum framkvæmdaatriðum áður en íbúar flytja í hið nýja hverfi. Og svona gæti ég lengi haldið áfram. Allt er á sömu bókina lært.

Korter fyrir kosningar

Ekkert af þessu er þó aðalatriðið hér: Aðalatriðið er sjálfumgleði og hroki þeirra fulltrúa R-listans sem fimmtudaginn 23. mars sl. létu loks draga sig upp á Kjalarnes á kosningafund, korter fyrir kosningar, hlusta þar á umkvartanir íbúanna, - en tóku síðan til máls og töluðu fjálglega um sínar fallegu framtíðarhugsjónir, en létu umkvartanirnar íbúanna sem vind um eyru þjóta.

Slík framkoma sýnir fádæma valdhroka og er því frágangssök.

Það er athyglisvert, að mörg - jafnvel flest - þeirra úrlausnarefna sem hér koma til álita, kosta borgina óverulegar fjárhæðir miðað við öryggishagsmuni Kjalnesinga. Spurningin snýst því ekki um fjármuni, heldur áhuga á velferð borgaranna og að staðið sé við gerða samninga.

Við sjálfstæðismenn teljum það sjálfsagða skyldu okkar að standa við samninga og gefin loforð. Við viljum láta verkin tala, teljum það skyldu okkar að hlusta á íbúa borgarinnar, forgangsraða verkefnum og framkvæma án tafar það sem er aðkallandi.og varðar öryggi borgarbúa. Við munum því standa við þau fyrirheit á Kjalarnesinu sem R-listinn hefur svikið.

Greinin birtist í Morgunblaðinu þriðjudaginn 28. mars 2006.