Hraðaskilti sett upp við Kjalarnes

Vegagerðin hefur sett upp hraðaskilti á Vesturlandsvegi, við Grundarhverfi þar sem er 70 km hámarkshraði. Uppsetning skilta sem þessara hefur orðið til þess að draga úr ökuhraða en það vakti óþægilega athygli vegagerðarmanna við uppsetninguna á skiltunum hversu margir óku hratt framhjá þeim, sá sem fór hraðast var á 110 km hraða samkvæmt radarmæli hraðaskiltisins.

Það verður aldrei of brýnt að aka varlega og á löglegum hraða.

Skiltin voru sett upp á Vesturlandsvegi beggja vegna við Grundarhverfi. Á þeim er hægt að sjá hve hratt bifreiðar aka eftir að komið er inn á kafla þar sem er 70 km. hámarkshraði, einnig blikka gul ljós ef bifreiðar eru yfir leyfðum hraða. Skiltin eru búin búnaði til að lesa af fjölda bíla og hraða þeirra einnig

Vegagerðarmönnunum sem unnu að uppsetningunni í síðustu viku var nokkuð brugðið:  "Við vorum að vinna á merktu vinnusvæði þar er 70 km hámarkshraði og menn og tæki í vegkantinnum, þegar annað skiltið var gangsett, sáum við bifreiðar koma inn í radargeislan á allt að 110 km klst. Við vissum að hraðinn væri nokkuð mikill en þetta verður að teljast vítavert gáleysi," sögðu þeir.

Frétt af vegagerdin.is

Stærstu bílaframleiðendur heims, helstu orkufyrirtæki Norðurlanda og leiðandi alþjóðleg fyrirtæki, stofnanir og einstaklingar í rafvæðingu samgangna koma saman í Reykjavík átjánda og nítjánda september næstkomandi til að ræða komandi byltingu í rafmagnssamgöngum á næstu fimm árum.

Ólafur Ragnar Grímsson, forseti Íslands, er verndari ráðstefnunnar Driving Sustainability, alþjóðlegs vettvangs fyrir orkulausnir í samgöngum og mun opna hana klukkan 09:05 að morgni fimmtudagsins 18. september.

Hátt settir stjórnendur bílaframleiðendanna Toyota, Ford, og Mitsubishi munu á ráðstefnunni veita innsýn í tæknilausnir sem miða að sjálfbærum samgöngum og munu standa neytendum til boða frá næsta og þarnæsta ári. Stærstu orkufyrirtæki Norðurlanda, Vattenfall í Svíþjóð og Dong Energy í Danmörku, vinna nú hörðum höndum að innleiðingu rafmagns í samgöngum, og munu þau skýra ráðstefnugestum frá áætlunum sínum. Hækkandi olíuverð, hröð þróun í rafhlöðum og hátækni leiðir þessa byltingu.

Volvo og Saab eru í samstarfi við Vattenfall um innleiðingu tengil-tvinnbíla í Svíþjóð, en þeim bílum má stinga í samband og aka tugi kílómetra á rafmagni áður en hefðbundin bílvél tekur við. Renault-Nissan samsteypan er hins vegar í samstarfi við Dong Energy, stærsta orkufyrirtæki Danmerkur um innleiðingu rafmagnsbíla og rafhlöðuskiptistöðva þar í landi ásamt bandaríska fyrirtækinu Better Place. Þá munu yfirmenn Mitsubishi Heavy Industries í Japan fjalla um hlutverk bifreiða í sjálfbærum orkuinnviðum og Mitsubishi Motors kynna rafmagnsbílinn MiEV en fjöldaframleiðsla á honum hefst á næsta ári.

Frétt af dv.is

Iðnaðarráðuneytið hefur framlengt bráðabirgðaleyfi Björgunar ehf. vegna efnistöku á hafsbotni Hvalfjarðar. Það gengur í berhögg við umsögn Orkustofnunnar og er í andstöðu við almenna skoðun sveitastjórna við Hvalfjörð. Fyrirtækið Björgun hefur stundað efnistöku úr sjó í nágrenni Reykjavíkur frá fyrri hluta 7. áratugar síðustu aldar.

Árið 2005 rann leyfi Björgunar út. Fyrirtækið fékk þá undanþágu til að dæla upp sandi í Hvalfirði m.a. á þeim forsendum að mat á umhverfisáhrifum væri í vinnslu. Tafir hafa þó orðið á að klára matið vegna þess að Björgun kærði að efnistakan þyrfti að fara í umhverfismat og fór málið fyrir héraðsdóm og í Hæstarétt.

Á föstudaginn endurnýjaði iðnaðarráðuneytið bráðabirgðaleyfi Björgunar í þriðja sinn með miklum takmörkunum þó. Það gerði ráðuneytið í andstöðu við umsögn Orkustofnunnar en í lok febrúar 2008 svaraði Orkustofnun landeigendum, hreppsstjórn Kjósarhrepps og sveitarstjórn Hvalfjarðarsveitar og sagði að ekki bæri að framlengja bráðabirgðaleyfi Björgunar. Var þar vitnað í lög um mat á umhverfisáhrifum. Þetta er ekki í fyrsta sinn sem iðnaðaráðuneytið framlengir bráðabirgðaleyfi Björgunar í andstöðu við stofnanir sem fjalla um málið.

Árið 2006 framlengdi iðnaðarráðuneytið bráðabirgðaleyfið í tvígang þvert ofan í umsögn umhverfisráðuneytis enda er sjávarbotn Hvalfjarðar mikilvægur íslenskum byggingariðnaði. Í erindi Björgunar til iðnaðarráðuneytisins 5. september segir að stöðvun efnisvinnslu hefði áhrif á afkomu annarra fyrirtækja og nefnir BM Vallá og Sementsverksmiðjuna á Akranesi. Sveitarstjórnir við Hvalfjörð hafa lengi verið á móti dælingu efna af sjávarbotni fjarðarins. Í samtali við fréttastofu Sjónvarps sagði oddviti Kjósarhrepps hreppsnefnd vera ósátta við framlengingu bráðabirgðaleyfis Björgunar. Það teldist þó áfangasigur að ráðuneytið hafði samráð við hreppsnefnd að þessu sinni.

Frétt af ruv.is

Í fyrrnefndu bréfi, dags. 28 febrúar 2008, er vitnað í 13. gr laga um mat á umhverfisáhrifum nr 106/2000. Greinin hljóðar svo:

13. gr. Leyfi til framkvæmda.

Óheimilt er að gefa út leyfi til framkvæmdar skv. 5. eða 6. gr. fyrr en álit Skipulagsstofnunar um mat á umhverfisáhrifum liggur fyrir eða ákvörðun um að framkvæmd skv. 6. gr. sé ekki matsskyld.
Við útgáfu leyfis til framkvæmdar skv. 1. mgr. skal leyfisveitandi kynna sér matsskýrslu framkvæmdaraðila um framkvæmdina og taka rökstudda afstöðu til álits Skipulagsstofnunar um mat á umhverfisáhrifum hennar. Leyfisveitandi skal birta opinberlega ákvörðun sína um útgáfu leyfis og niðurstöðu álits Skipulagsstofnunar um mat á umhverfisáhrifum innan tveggja vikna frá útgáfu leyfis. Í ákvörðun skal tilgreina kæruheimild og kærufrest þegar það á við.

Hafi verið gefið út leyfi til bráðabirgða geta þá stofnanir ríkisins gert það sem hentar, lögin gilda þegar þess þarf eða er Björgun að gera það sem þeim hentar.

Á vefnum kjos.is kemur fram áskorun hreppsnefndar Kjósarhrepps til Iðnaðarráðherra að framlengja ekki leyfi til bráðabirgða til efnistöku af hafsbotni Hvalfjarðar. Í athugasemd sem lesandi vefsins gerði segir:

"Eins fram kemur í bréfi Orkustofnunar dags. 28 feb. 2008 til undirritaðs og Kjósarhrepps og fl. er óheimilt að veta vinnsluleyfi fyrr en að afstöðnu umhverfismati, skv. 13. gr. laga nr. 106/2000. Það er því vel til fundið að skora á ráðherra að fara að lögum."

Þurfun við virkilega að skora á yfirvöld um að fara að lögum. {mosimage}

Kjalnesingar eru hvattir til að taka höndum saman og mæta á leiksvæðið í Grundarhverfi og hreinsa hverfið saman.

Hreinsunin hefst kl. 14:00 og stendur til kl. 16:00.

Þegar búið er að hreinsa hverfið verður boðið upp á grillaðar pylsur.

Sama dag verður kynnt fyrir fjölmiðlum að Kjalarnes er fyrsta hverfið í Reykjavík sem í heild sinni tekur upp Nágrannavörslu.

Kjalnesingar fjölmennum og hreinsum til í hverfinu okkar saman.

Hverfisráð Kjalarness

Fyrst þarf að skrá sig inn á vefinn með því að velja hér vinstramegin "Búðu til einn". Því næst er að fylla út formið sem þá birtist og senda. Vefurinn sendir til baka email á uppgefið póstfang og þá er að skrá sig inn til vinstri með þeim aðgangsorðum sem valin voru  og velja hér til hægri "Subscribe here". þá er hægt að velja fréttaflokkana og samþykkja.

Komi upp eitthver vanndræði með þettað má senda póst á kjalarnes@kjalarnes.is og óska eftir aðstoð.

Til hamingju með þettað Kjalnesingar og góða skemmtun.

Aðkoma opinberra aðila

Kynning og undirbúningur málsins

En af hverju Ísland, og af hverju Hvalfjörður?

Af ábyrgð og ímynd

Samgöngur til og frá höfuðborginni

Að undanförnu hafa átt sér stað talsverðar umræður um samgöngumál og umferðaröryggi. Sú umræða hefur oftar en ekki skapast í framhaldi af slysum eða umferðaróhöppum og inn í þá umræðu blandast eðlilega samgöngur til og frá Reykjavík. Það er því hryggilegt að sjá hversu litla áherslu stjórnvöld leggja á frekari samgöngubætur til og frá höfuðborginni okkar. Samtök Sveitarfélaga á Vesturlandi hafa síðastliðin ár lagt mikla áherslu á mikilvægi tvöföldunar á þjóðvegi 1 frá Holtavörðuheiði að Kollafirði. Hafa samtökin bent á mikilvægi þess að hefjast framkvæmda sem fyrst vegna þeirrar miklu aukningar á þungaflutningum á þessum slóðum síðastliðin ár. Hafa önnur samtök, þar á meðal íbúasamtökin á Kjalanesi sem og Hverfisráð Kjalarness, sent frá sér ályktanir sem snúa að þessum málum. 

Slit og slysahætta

Í dag er ekkert flutningaskip sem siglir úti fyrir ströndum Íslands með viðkomu í helstu höfnum hringinn í kringum landið. Það er eðlilegt að vöruflutningar hafi færst í auknum mæli inn á þjóðvegakerfið vegna krafna um ferskleika vöru við afhendingu. Staðreyndin er hins vegar sú að þróunin hefur leitt til þess að allir flutningar fara landleiðina því ekki hefur þótt hagkvæmt að aðeins hluti vöruflutninga sé á hafi úti. Allir flutningar fara því landleiðina með þeirri miklu umferð sem því fylgir og ómældu sliti á vegakerfinu. Þessir flutningabílar eru allt að 50 tonn fullhlaðnir á meðan meðalfólksbíllinn er innan við 2 tonn. Hver maður sér hina auknu slysahættu sem af þessu hefur hlotist. Það er því löngu tímabært að kanna kosti þess að niðurgreiða strandsiglingar með opinberu fé því talsverður sparnaður hlýtur að koma á móti vegna minna slits á vegakerfi landsmanna og vegna minni slysahættu. Þetta er sú alvarlega staðreynd sem blasir við okkar í dag – flutningar á vörum og sjávarfangi fara þvers og kruss um þjóðvegi landsins, flestir með viðkomu í höfuðborginni, og aldrei kemur Sundabraut. 

Hefjumst handa við tvöföldun þjóðveganna til og frá Reykjavík

Ég tel að á meðan samgönguráðherra er að velta fyrir sér legu Sundabrautar og því hvort innheimta eigi veggjald vegna þeirrar framkvæmdar þá gæti hann byrjað að gera vegina til og frá höfuðborginni sómasamlega. Hann gæti byrjað nú þegar að tvöfalda akreinar frá Borgarnesi að Reykjavík, þ.e. að þeim stað sem Sundabraut kemur upp á Kjalarnes. Vesturlandsvegur í þeirri mynd sem hann er í nú gengur ekki og þolir enga bið. Hið sama á við um Suðurlandsveg til Selfoss. Við höfum horft upp á svo mörg alvarleg slys á þessum vegaköflum undanfarin ár og alltaf þyngist umferðin. 

Landsmenn eru orðnir langþreyttir á aðgerðaleysi samgönguyfirvalda og vilja skýr svör og ákvarðanir. 

Því segi ég vaknaðu herra samgönguráðherra. Slysin gera ekki boð á undan sér. 

Þórir Ingþórsson

Esjugrund 52

116 Kjalarnesi

Marta Guðjónsdóttir fulltrúi sjálfstæðismanna í Hverfaráði Kjalarness skrifaði grein sem birtist í Morgunblaðinu þriðjudaginn 28. mars 2006.

{mosimage}

Kjalarnesið - Vítaverð vanræksla R-listans

Ég hef setið í hverfisráði Kjalarness á þessu kjörtímabili og fylgst þar með þeim vinnubrögðum R-listans er lúta að málefnum íbúanna. Þau vinnubrögð geta ekki fengið aðra umsögn en vítaverð vanræksla. Tekið hefur verið á brýnustu hagsmuna- og öryggismálum íbúanna með fullkomnu sinnuleysi og framtaksleysi og endalausum innantómum loforðum sem flest, ef ekki öll, hafa lent upp í erminni.

Kjalnesingar hlunnfarnir

Sú var tíðin, 1998, að fyrrverandi borgarstjóri, Ingibjörg Sólrún Gísladóttir, hafði uppi fjálglega frasa um gagnkvæma hagsmuni, beggja sveitarfélaganna, Reykjavíkur og Kjalarness, af sameiningunni.

En nú er öldin önnur: R-listanum hefur ekki þótt neitt sjálfsagðara en að svíkja flest loforð gagnvart Kjalnesingum og brjóta á þeim samninga, m.a. þann samning sem sveitarfélögin gerðu með sér við sameininguna. Kjalnesingar hafa svo sannarlega fengið að reyna að þeir eru olnbogabarn borgarinnar. Nú er svo komið að margir málsmetandi Kjalnesingar, telja sig og sveitunga sína hafa heldur betur verið hlunnfarna, og eru farnir að efast um réttmæti sameiningarinnar.

Öryggismál í ólestri

Kjalarnesið er beinlínis lífshættulegt íbúasvæði, börnum, unglingum og fullorðnum. Það er oft stórhættulegt ökumönnum og farþegum þeirra að hægja mikið á sér á Vesturlandsveginum og beygja síðan inn í Grundarhverfið vegna ógnarhraða og sívaxandi umferðar, sífellt stærri og fleiri vöruflutningabíla, að ekki sé nú talað um aðra og fáfarnari afleggjara Vesturlandsvegar á Kjalarnesi.

Sjálfstæðismenn í umhverfisráði lögðu fram tillögur um úrbætur í umferðaröryggismálum á Kjalarnesi 22. febrúar sl., en R-listinn frestaði tillögunni. Það er dæmigerð afstaða þeirra þegar málefni Kjalarness eru annars vegar.

Börn og unglingar á Kjalarnesi hafa reynt eftir megni að leika knattspyrnu í moldarsvaði meðfram Vesturlandsveginum þar sem umferðarþunginn er gífurlegur. Þar er ekki einu sinni rolluheld girðing og svo stutt í þjóðveginn að boltinn fer oft út á og yfir veginn. Börnin og unglingarnir hafa þolinmóð beðið eftir, einum einasta, þokkalegum sparkvelli frá því slíkum velli var lofað fyrir tveimur árum. En þar er líklega til of mikils mælst, enda bólar ekkert á vellinum.

Margsvikin loforð

Meira en helmingur vegakerfisins á Kjalarnesinu er malarvegir eins og tíðkuðust í Reykjavík áður en Geir Hallgrímsson, þáverandi borgarstjóri, útrýmdi slíkum götum og vegum á sjöunda áratug síðustu aldar. Nýbyggingin við grunnskóla hverfisins, Klébergsskóla, heldur ekki vatni og hefur ekki gert það frá því hún var tekin í notkun.

Fjögur ár, samfleytt, frestaðist skólahald við Klébergsskóla vegna seinkunar á framkvæmdum við skólann. Skólalóð Klébergsskóla er algjörlega ófrágengin, þrátt fyrir margítrekuð loforð um frágang hennar. Leikskólinn sem upphaflega og réttilega átti að verða þriggja deilda, var minnkaður niður í tveggja deilda skóla með þeim afleiðingum að hann er nú þegar orðinn of lítill. Aðkoman að honum er kennslubókardæmi í slysagildrum fyrir börn og fullorðna.

Enn hefur ekki verið lokið við gangstéttagerð og ýmsan annan frágang við götur Grundarhverfis þó nú hafi í mörg ár tíðkast í Reykjavík og öðrum bæjarfélögum að ganga frá slíkum framkvæmdaatriðum áður en íbúar flytja í hið nýja hverfi. Og svona gæti ég lengi haldið áfram. Allt er á sömu bókina lært.

Korter fyrir kosningar

Ekkert af þessu er þó aðalatriðið hér: Aðalatriðið er sjálfumgleði og hroki þeirra fulltrúa R-listans sem fimmtudaginn 23. mars sl. létu loks draga sig upp á Kjalarnes á kosningafund, korter fyrir kosningar, hlusta þar á umkvartanir íbúanna, - en tóku síðan til máls og töluðu fjálglega um sínar fallegu framtíðarhugsjónir, en létu umkvartanirnar íbúanna sem vind um eyru þjóta.

Slík framkoma sýnir fádæma valdhroka og er því frágangssök.

Það er athyglisvert, að mörg - jafnvel flest - þeirra úrlausnarefna sem hér koma til álita, kosta borgina óverulegar fjárhæðir miðað við öryggishagsmuni Kjalnesinga. Spurningin snýst því ekki um fjármuni, heldur áhuga á velferð borgaranna og að staðið sé við gerða samninga.

Við sjálfstæðismenn teljum það sjálfsagða skyldu okkar að standa við samninga og gefin loforð. Við viljum láta verkin tala, teljum það skyldu okkar að hlusta á íbúa borgarinnar, forgangsraða verkefnum og framkvæma án tafar það sem er aðkallandi.og varðar öryggi borgarbúa. Við munum því standa við þau fyrirheit á Kjalarnesinu sem R-listinn hefur svikið.

Greinin birtist í Morgunblaðinu þriðjudaginn 28. mars 2006.